(ඩයනා උදයංගනී)

දිවයිනේ ප්‍රදේශ රැසකට බලපා ඇති තද සුළං සහිත කාලගුණ තත්වය හෙට (12) දහවල තෙක් පවතිනු ඇතැයි කාලගුණ විද්‍යා දෙපාර්තමේන්තුව පවසයි.

මධ්‍යම කඳුකරයේ බටහිර බෑවුම් ප්‍රදේශවල සහ බස්නාහිර, සබරගමුව පළාත්වලත්, ගාල්ල සහ මාතර දිස්ත්‍රික්කවලත් විටින් විට පැයට කිලෝමීටර 60, 70 පමණ වේගවත් තද සුළං ඇතිවිය හැකි බව කාලගුණ විද්‍යා දෙපාර්තමේන්තුව තද සුළං පිළිබඳ අවවාදාත්මක නිවේදනයක් නිකුත් කරමින් දැනුම් දී ඇත.

පුත්තලම සිට කොළඹ, හම්බන්තොට හරහා පොතුවිල් දක්වා වන ගැඹුරු සහ නොගැඹුරු මුහුදු ප්‍රදේශවල ද පැයට කිලෝමීටර 60, 70 පමණ වේගවත් තද සුළං ඇතිවන බැවින් එම මුහුදු ප්‍රදේශ ද විටින් විට රළු වන බව එම නිවේදනයේ දැක්වේ.

එබැවින් එම මුහුදු ප්‍රදේශවල ධීවර හා නාවුක කටයුතුවල නිරතවීම අවදානම් බවත්, ඒ සම්බන්ධයෙන් ධීවර දෙපාර්තමේන්තුවේ අනාවැකි මැදිරිය නිරන්තරයෙන් දැනුවත් කරන බවත් එහි සඳහන්ය.