(උපාලි ආනන්ද)


ස්වයංක‍්‍රීය ගිනි අවි සඳහා යොදන ජීව උණ්ඩ තුන් දහසක්  පාතාල ක්‍රියාකාරිකයකුට ලබා දුන්නැයි  සැක පිට  පදවිය වෙහෙරතැන්න ප‍්‍රදේශයේ යුද හමුදා කඳවුරක අණ දෙන නිලධාරිවරයෙකු ලෙස රාජකාරි කරන යුද හමුදා මේජර්වරයකු සහ තවත් දෙදෙනකු අත්අඩංගුවට ගෙන ඇතැයි සියඹලාණ්ඩුව පොලීසිය පවසයි.


මේජර්වරයාගේ  රියදුරා ලෙස රාජකාරි කරන කෝප‍්‍රල්වරයෙකු සහ සහයකයා ලෙස රාජකාරි  කරන යුද  හමුදා සෙබලෙකු මෙසේ අත්අඩංගුවට ගත් සෙසු සකකරුවෝය.


පසුගිය දිනකදී සියඔලාණ්ඩුව ප‍්‍රදේශයෙන්  ස්වයංක‍්‍රීය ගිනි අවි සඳහා යොදන උණ්ඩ තුන් දහසක් සොයාගත් අතර එහිදී අත්අඩංගුවට ගත් පාතාල සාමාජිකයකුගෙන් අනාවරණය කර ගත් තොරතුරු මත මොවුන් අත්අඩංගුවට ගෙන තිබේ.


අත් අඩංගුවට ගැනුණු මේජර්වරයා සතුව තිබී සිම් කාඩ් පත් 13 ක් සහ ජංගම දුරකතන 5 ක් පොලිස් බාරයට ගෙන තිබේ.


මේ අතර මෙම මේජර්වරයා පරිහරණය කළ කැබ් රථයක්ද පොලිස් බාරයට ගෙන තිබේ.


මේ අතර මෙම යුද හමුදා මේජර්වරයාගේ බැංකු ගිණුම්වල රුපියල් ලක්ෂ අනූවකට අධික මුදලක් තැන්පත් කර ඇති බවටද පොලිසිය කරුණු අනාවරණය කර ගෙන  තිබේ.


 මෙම සිද්ධියට සම්බන්ධ බවට සැක කෙරන තවත් යුධ හමුදා කපිතාන්වරයෙකුද අත් අඩංගුවට ගැනීම සඳහා පොලිස් විමර්ශන අරඹා තිබේ.