( තිළිණි ද සිල්වා )

කොවිඩ් වසංගතය පැවතියදීත් මේ වසරේ මුල් මාසය නවය තුළ දී රජය රුපියල් කෝටි 1882 ක් වටිනාකමක් ඇති නව සංචාරක ආයෝජන ව්‍යාපෘති 22 ක් අනුමත කර ඇතැයි සංචාරක අමාත්‍ය  ප්‍රසන්න රණතුංග මහතා අද (18) පැවසීය.

ජනවාරි මාසයේ සිට සැප්තැම්බර් මාසය දක්වා ගෙවුණු මාස 09 තුළ ඉදිරිපත් වූ රුපියල් කෝටි 2044 කට වැඩි වටිනාකමක් ඇති සංචාරක ආයෝජන ව්‍යාපෘති 33 ක්  අනුමැතිය සදහා ඉදිරිපත් වූ අතර ඒ අතරින් මෙම නව සංචාරක ව්‍යාපෘති සදහා අනුමැතිය දුන් බවද සංචාරක අමාත්‍යවරයා වැඩිදුරටත් කීවේය. 

ඒ අනුව විනෝදාස්වාදය පදනම් කරගත් උද්‍යාන, කේබල් කාර් ව්‍යාපෘති, පාවෙන ආපනශාලා, දිය යට කලාගාර වැනි ආයෝජන සදහා අනුමැතිය ලබා දි තිබේ. ආගමික, සංස්කෘතික ජාතික උරුමයන්, ත්‍රාස්‍යජනක ක්‍රීඩා, ආයුර්වේද යන ක්ෂේත්‍ර වලට අදාළ ව මෙම නව සංචාරක  යෝජනා ඉදිරිපත් වූ බවද අමාත්‍ය ප්‍රසන්න රණතුංග මහතා කියා සිටී.

කොවිඩ් වසංගතය අතරතුරේ වුවද ශ්‍රී ලංකාවේ  සංචාරක ආයෝජනය සදහා යෝජනා ඉදිරිපත් විම ඉතා හොද ප්‍රවණතාවයක් යැයි අමාත්‍යවරයා පෙන්වා දේ.

ශ්‍රි ලංකා සංචාරක සංවර්ධන අධිකාරිය යටතේ පිහිටුවා ඇති ආයෝජන සබදතා ඒකකයෙන්  සංචාරක ආයෝජන සදහා අනුමැතිය ලබාදිම කඩිනම් කිරීම සදහා කටයුතු කරන අතර, ඒ අනුව  ඊට අදාළ රාජ්‍ය ආයතන 43 ක් සමග අවබෝධතා ගිවිසුම් වලට අත්සන් කිරිමට ද කටයුතු කෙරුණු බවද හෙතෙම කීය.

සංචාරක ආයොජනයන්හි දි පරිසර හිතකාමි සංචාරක ව්‍යාපෘතීන් පිළිබද රජය වැඩි අවධානයක් යොමු කරන බවද කී සංචාරක අමාත්‍යවරයා වැඩිදුරටත් කියා සිටියේ ලබන වසර වනවිට මෙරටට ඉදිරිපත් වන සංචාරක ආයෝජන සංඛ්‍යාව මීට වඩා  වැඩිවනු ඇති බවය.

කොවිඩ් හේතුවෙන් බිද වැටුණු සංචාරක කර්මාන්තය ක්‍රමයෙන් යථා තත්ත්වයට පත්වෙමින් තිබෙන අතර ඉදිරියේ දී මෙරටට පැමිණෙන සංචාරකයන් සංඛ්‍යාව වැඩිවනු ඇතැයි ද අපේක්ෂා කරන බවද අමාත්‍ය ප්‍රසන්න රණතුංග මහතා වැඩිදුරටත් කියා සිටියේය.