(ඉන්දිකා රාමනායක)

ත්‍රිවිධ හමුදාව, සෞඛ්‍ය අමාත්‍යාංශය සහ ආරක්ෂක අමාත්‍යාංශය විසින් පවත්වාගෙන යනු ලබන නිරෝධායන මධ්‍යස්ථානයන් සඳහා යොමු කරනු ලබන  දෙස් විදෙස්  පිරිසෙන්  කිසිදු මුදලක් අය නොකරන බව වැඩබලන ආරක්ෂක මාණ්ඩලික ප්‍රධානි හා  යුද හමුදාපති    ලුතිනන් ජනරාල් ශවේන්ද්‍ර සිල්වා මහතා පවසයි.

  නිරෝධායන මධ්‍යස්ථාන   සදහා යොමු කරන පුද්ගලයන්ගෙන් ආහාර සදහා රුපියල්  7500 ක මුදල් අයකරන බවට සමාජ මාධ්‍ය ජාල වල පලවන   වීඩියෝවක් සම්බන්ධයෙන්  ලංකාදීපය හමුදාපතිවරයාගෙන්   කළ විමසුමකට පිළිතුරු  දෙමින් හමුදාපතිවරයා මේ බව පැවසීය.

මේ සම්බන්ධයෙන් සාමාජ මාධ්‍ය වල  පලවන   ප්‍රවෘත්ති සම්බන්ධයෙන්    අවධානය යොමු නොකළ යුතු බවත්  නිරෝධායන  සදහා මුදල් අය කිරීමක් කිසිසේත්ම සිදුනොකරන  බවත් හමුදාපතිවරයා වශයෙන් තමන්  ඉතාමක් වගකීමෙන්  ප්‍රකාශ කරන බවද හමුදාපතිවරයා කියා සිටියේය. 

ජනාධිපති  ගෝඨාභය රාජපක්ෂ මහතාගේ උපදෙස් මත සෞඛ්‍ය අමාත්‍යාංශයේ සහ ආරක්ෂක අමාත්‍යාංශයේ බලධාරීන් හා එක්ව සහයෝගීත්වයෙන්  මෙම  ජාතික වගකීම ත්‍රිවිධ හමුදාව යළිත් වරක් භාරගෙන ඇති බවද  හෙතෙම කීය.

 මෙරටට පැමිණෙන ශ්‍රී ලාංකිකයන් සහ විදේශිකයන් නිරෝධායනය කිරීම සඳහා මඩකලපුව පූනානී සහ කන්දකාඩු වැඩිදියුණු කරන ලද තාවකාලික නිරෝධානය මධ්‍යස්ථාන දෙකෙහී අවම වශයෙන් සති දෙකක කාළයක් පුරා 2000-2500 අතර පිරිසකට සියලු පහසුකම්  සහිතව  නේවාසිකව නිරෝධායනය  කටයුතු කිරීමට අවශ්‍ය සියළු පහසුකම් මේවන විට සුදානම් කර ඇති බවද හමුදාපතිවරයා කියා සිටියේය. 

නැගෙනහිර ආරක්‍ෂක සේනා මූලස්ථාන යටතේ සේවයෙන් නියුතු යුද්ධ හමුදා සාමාජිකයන් සියයක් පමණ පසුගිය පැය 48 ක කාලය තුළ මඩකලපුව පුනානී සහ කන්දකාඩු නිරෝධායන මධ්‍යස්ථානයන්හී එම නිරෝධායන ක්‍රියාවලිය සිදුකිරිමට අවශ්‍ය සියලු පහසුකම් සූදානම් කළ බවද    හමුදාපතිවරයා කියා සිටියේය. 

හදිසි අවස්ථාවක රෝගින් 300 කට පමණ ප්‍රතිකාර කිරිම සඳහා දියතලාවේ නිරෝධායන මධ්‍යස්ථානය සුදානම්ව ඇති බවද හමුදාපතිවරයා වැඩිදුරටත් සඳහන් කළේය.