(හිරාන් ප්‍රියංකර ජයසිංහ සහ ඔගස්ටීන් ප්‍රනාන්දු) 
 
හලාවත නල්ලදරන්කට්ටුව මුතුපන්තිය කනිටු විද්‍යාලයේ අද (7) අළුයම කාලයේ කිසිවකු සැරිසැරූ බවට ලද තොරතුරක් මත පාසලට පැමිණි සිසුන් ආපසු නිවාසවලට යවා පොලිසිය, යුද හමුදාව හා දෙමාපියන් යොදවා දැඩි සෝදිසි කිරීමකට ලක් කළ බව මුතුපන්තිය කනිටු විද්‍යාලයේ විදුහල්පති විමලසේන කළුගමගේ මහතා පැවසීය. 
 
මුතුපන්තිය පාසල ආසන්නයේ පදිංචිකරුවකු  අද අළුයම අවදි වී පාසල නිරීක්ෂණය කිරීමේදී කළු පැහැති ඇඳුමක් හැඳගත් අයකු පාසල් භුමියේ සිට දිවයනු දැක ඇති බවද ගම්වාසින් පාසල සහ අවට සෝදිසි කර තිබුණද කිසිවක් හමු නොවූ බවද ප්‍රදේශවාසීහු  කියති. 
 
ඉබි යතුරු දමා අගුළු දමා තිබූ පාසලේ ප්‍රධාන දොරටුව කිසිවකු ගලවා, පාසල් වැසිකිලිවල ජල කරාම විවෘත කර ජලය ගලායාමට සලස්වා තිබූ බවත් යම් සැකයක් මතුවීම නිසා ආරච්චිකට්ටුව පොලිසිය හා පුත්තලම යුධ හමුදා කදවුර දැනුවත් කිරීමට කටයුතු කළ බවත් විද්‍යාලයේ විදුහල්පතිවරයා  පැවසීය.
 
ඒ අනුව පොලිස් නිලධාරීන් පාසලට පැමිණ පාසල් භුමිය ද දැඩි පරීක්ෂාවට ලක් කර ඇත.
 
 “පාන්දර අපිට ආරංචි වුණා කවුරු හරි පාසල් භුමියේ රැඳිලා ඉඳලා දිව්වා කියලා. අපි එකතුවෙලා හැමතැනම සෙව්වා. නමුත් කිසිම කෙනෙකුට සැකකටයුතු යමක් හෝ පුද්ගලයෙක් සොයාගන්න බැරිව ගියා. රටේ තිබෙන තත්වයත් එක්ක අපිට දැන් බයකුත් දැනෙනවා. නමුත් අපි පාසලේ ආරක්ෂාව වෙනුවෙන් හැම මොහොතේම කටයුතු කරන්න සුදානම්. මොකද එහා පැත්ත කලපුව, ඒ මදිවට කඩොලාන තිරය නිසා අපි දැන් බයවෙලා ඉන්නේ” මේ පිළිබඳව අදහස් දක්වමින් සිටි පාසල් ආරක්ෂක කමිටුවේ ක්‍රිස්ටෝපර් මිල්ටන් මහතා පැවසීය.