(දයාරත්න ඇඹෝගම)
 
එක්සත් ජාතික පක්ෂ ආධාරකරුවන්ට පමණක් බෙදාදීමට සැලසුම් කර ඇති, තඹුත්තේගම ප්‍රාදේශීය ලේකම් කාර්යාලයට ලොරි 7කින් රැගෙන ආ සෙවිලි තහඩු බෙදීම වහාම අත්හිටුවන ලෙසට උතුරු මැද පළාත් සභාවේ හිටපු සභාපති ටී.එම්.ආර්.සිරිපාල මහතා විසින් අනුරාධපුර මැතිවරණ කාර්යාලයට අද(13) පැමිණිලි කර තිබේ.
 
මේ සම්බන්ධයෙන් අදහස් දැක්වූ උතුරු මැද පළාත් සභාවේ හිටපු සභාපති ටී.එම්.ආර්.සිරිපාල මහතා මෙසේද පැවසිය.
 
“අද (13) උදෑසන සිට කොළඹින් ලොරි හතකින් දහස් ගණනක් සෙවිලි තහඩු රැගෙන ආවා. එම සෙවිලි තහඩු තඹුත්තේගම ප්‍රාදේශීය ලේකම් කාර්යාලයේ ගොඩ ගසා තිබෙනවා. මේ තහඩු ජනතාවට බෙදා දෙනවාට අපේ විරුද්ධතාවයක් නැහැ. ඒත් තහඩු නීතිවිරෝධී ආකාරයට එක්සත් ජාතික පක්ෂ ආධාරකරුවන්ට පමණක් බෙදාදීමට සැලසුම් කර තිබෙනවා.
 
මේ ජනාධිපති මැතිවරණ සමයේ මැතිවරණ නීතිරිති උල්ලංඝණය කරමින් සෙවිලි තහඩු බෙදීමට අපි විරුද්ධයි. එනිසා මේ සම්බන්ධයෙන් අපි මැතිවරණ දෙපාර්තමේන්තුවේ අනුරාධපුර කාර්යාලයට පැමිණිලි කළා. මේ සම්බන්ධයෙන් සොයා බලා නීතිමය ක්‍රියා මාර්ගයක් ගන්න. මැතිවරණය අවසන් වන තෙක් මෙම සෙවිලි තහඩු බෙදාදීම අත් හිටුවන්නැයිද ඉල්ලා සිටිනවා” යැයි කීය.
 
මේ සම්බන්ධයෙන් අනුරාධපුර දිස්ත්‍රික් ලේකම් ආර්.එම්.වන්නිනායක මහතාගෙන්ද තඹුත්තේගම ප්‍රාදේශිය ලේකම් රේණුකා වන්සේකර මහත්මියගෙන්ද විමසු අවස්ථාවේ ඔවුන් කියා සිටියේ මෙම සෙවිලි තහඩු ගම්පෙරළිය වැඩසටහන යටතේ මීට මාස කිහිපයකට පෙර ඇණවුම් කල සෙවිලි තහඩු තොගයක් බවයි. තහඩු බෙදාදීම සම්බන්ධයෙන් මෙතෙක් තීරණයක් ගෙන නොමැති බවත්, ඒවා බෙදාදීමට අවශ්‍ය වුවහොත් මැතිවරණ කොමිෂන් සභාවේ අනුමැතිය ලබාගෙන ඒ සම්බන්ධයෙන් කටයුතු කරන බවත් ඔවුහු පැවසුහ.