(මනෝප්‍රිය ගුණසේකර)
 
මෛත්‍රීපාල සිරිසේන මහතා සහ රනිල් වික්‍රමසිංහ මහතා අතර ගිවිසුමක් ඇති බවට කූඨ ලෙස සකස් කළ ලියවිල්ලක් මාධ්‍යයට ඉදිරිපත් කළ බවට චෝදනා ලැබ සිටින එක්සත් ජාතික පක්‍ෂයේ හිටපු මහලේකම් තිස්ස අත්තනායක මහතාට එරෙහි නඩුව කෙටි ක්‍රමයකින් අවසන් කර ගැනීම සඳහා ගන්නා ඉදිරි ක්‍රියාමාර්ග ලබන 24 වැනිදා දැනුම් දෙන ලෙස කොළඹ මහාධිකරණ විනිසුරු විකුම් කළුආරච්චි මහතා අද (25) දැනුම් දුන්නේය.

මෙම නඩුවට මුල් වු කූඨ ලෙස සකස් කළ ලියවිල්ලක් මාධ්‍යයට ඉදිරිපත් කළැයි කියන සිද්ධිය සම්බන්ධයෙන් කණගාටුව පළකර සමාව අයැදින්නේ නම් මෙම සිද්ධිය සමථයට පත් කරගැනීමට ජනාධිපතිවරයා මෙන්ම අගමැතිවරයා ද එකඟ බවට වු කරුණ සම්බන්ධයෙන් තිස්ස අත්තනායක මහතා සමඟ සාකච්ඡා කර දැනුම්දීම සඳහා දිනයක් ලබාදෙන්නැයි ජනාධිපති නීතීඥ කාලිංග ඉන්ද්‍රතිස්ස මහතා කළ ඉල්ලීමක් සැළකිල්ලට ගත් විනිසුරුවරයා එලෙස දැනුම් දුන්නේය.

මෙම නඩුව විභාග කිරීම සඳහා කැඳවනු ලැබු අවස්ථාවේදී මෙම නඩුවේ විත්තිකාර එක්සත් ජාතික පක්‍ෂයේ හිටපු මහලේකම් තිස්ස අත්තනායක මහතා අධිකරණයේ පෙනී සිටියේය. 

2014 දෙසැම්බර් මස 31 වැනිදා හෝ ඊට ආසන්න දිනයක කොළඹදී මෛත්‍රීපාල සිරිසේන මහතා සහ රනිල් වික්‍රමසිංහ මහතා අතර ගිවිසුමක් ඇති බවට කූඨ ලෙස සකස් කළ ලියවිල්ලක් මාධ්‍යයට ඉදිරිපත් කිරිමෙන් දඬුවම් ලැබිය හැකි වරදක් සිදු කර ඇති බව නීතිපතිවරයා විසින් චෝදනා නගනු ලැබ ඇත.

රනිල් වික්‍රමසිංහ මහතා සහ මෛත්‍රීපාල සිරිසේන මහතා අතර ගිවිසුමක් ඇති බවට පසුගිය ජනාධිපතිවරණයට ආසන්න අවස්ථාවේ පවසමින් කූඨ ලෙස සකස් කළ ලියවිල්ලක් මාධ්‍ය වෙත ඉදිරිපත් කිරීමෙන් එවර ජනාධිපතිවරණයේ අපේක්‍ෂකයකු වූ මෛත්‍රීපාල සිරිසේන මහතාගේ මැතිවරණ ප්‍රතිඵලයට බලපෑ හැකි ආකාරයට කටයුතු කළ බවද නීතීපතිවරයා විසින් විත්තිකාර තිස්ස අත්තනායක මහතාට  එරෙහිව  ඉදිරිපත්  කර ඇති නඩුවේ සඳහන් කර ඇත.

විත්තිකරුට එරෙහිව ඉදිරිපත් කර ඇති චෝදනා තුන දණ්ඩ නීතී සංග්‍රහය යටතේ සහ සිවිල් හා දේශපාලනඥයින් අතර ජාත්‍යන්තර සම්මුති පනත යටතේ දඬුවම් ලැබිය හැකි වරදවල් සිදුකර ඇති බවද නඩු ගොනුවේ සඳහන් වේ.