(එෆ්.අස්ලම්)

ජනපති අපේක්ෂකයින් සිය මැතිවරණ ප්‍රතිපත්ති ප්‍රකාශන තුළින් දෙමළ ජනතාවගේ අර්බුදයට වන පොරොන්දුව සැලකිල්ලට ගෙන දෙමළ ජාතික සන්ධානය තීරණයක් ගන්නා බව එම සන්ධානයේ නායක පාර්ලිමේන්තු මන්ත්‍රී ආර්.සම්බන්ධන් මහතා පැවසීය.

කිසිදු අපේක්ෂකයකු මෙතෙක් ප්‍රතිපත්ති ප්‍රකාශන ඉදිරිපත් කර නොමැති අවස්ථාවක හදිසි වී තීන්දු තීරණ ගැනීමේ කිසිදු අවශ්‍යතාවක් දෙමළ ජාතික සන්ධානයට නොමැති බවද සම්බන්ධන් මහතා සඳහන් කළේය.

ඉදිරි ජනාධිපතිවරණය සම්බන්ධයෙන් දෙමළ ජාතික සන්ධානයේ ස්ථාවරය හා තීරණය පිළිබද අද(13) මෙසේ පැවසීය.

එහිදී වැඩිදුරටත් අදහස් දැක්වූ සම්බන්ධන් මහතා මෙසේද කියා සිටියේය.

"ජනධිපතිවරණය ප්‍රකාශයට පත්කරලා නාමයෝජනා ලැබීමෙන් පසු සියළුම දේශපාලන පක්ෂ සිය මැතිවරණ ව්‍යාපාරය පටන් අරගෙන තියෙනවා. එහෙත් එකදු ප්‍රධාන දේශපාලන බලවේගයක අපේක්ෂකයකු හෝ මෙතෙක් සිය ප්‍රතිපත්ති ප්‍රකාශනය ප්‍රකාශයට පත්කරලා නැහැ. මේ නිසා එකපාරම අපිට අපේ සහාය කාටද කියල තීරණය කරන්න බැහැ. අපි කල්පනාකාරීව අවබෝධයකින් යුතුව තීරණයක් ගතයුතුව තිබෙනවා.

ජනාධිපතිවරණයට  ඉදිරිපත්ව සිටින එක්සත් ජාතික පෙරමුණේ ජනපති අපේක්ෂක සජිත් ප්‍රේමදාස දෙමළ ජාතික සන්ධානය හමුවුණා. අගමැති රනිල් ඇතුළු එජාප කණ්ඩායමකුත් හමුවුණා. ඒ වගේම හිටපු ආරක්ෂක ලේකම් ගෝඨාභය රාජපක්ෂත් එම්.ඒ.සුමන්තිරන් මහතා සමගින් ජනපතිවරණය ගැන කතා කරල තිබුණා. මේ කිසිදු සාකච්ඡාවක් නිල නොවන ලෙස සිදු වුණේ.

ජනාධිපතිවරණය සම්බන්ධයෙන් දෙමළ ජාතික සන්ධාන පාර්ලිමේන්තු කණ්ඩායමත් රැස්ව සාකච්ඡා කළා. එහිදී දෙමළ ජනතාවගේ අර්බුදයට ස්ථිර විසඳුම් ගෙන ඒමට මැදිහත් වන මැතිවරණ ප්‍රතිපත්ති ප්‍රකාශනය තුළින් ඒ බව සහතික කරන අපේක්ෂකයකු හට අපේ සහාය දැක්විය යුතුයි කියන ස්ථාවරයේ සියලු මන්ත්‍රීවරුන් පසුවුණා. ඒ අනුව මැතිවරණ ප්‍රතිපත්ති ප්‍රකාශනය හා ඉදිරි දැක්ම ඒ ඒ අපේක්ෂකයින් විසින් ඉදිරිපත් කිරීමෙන් පසුව අප ඒ ගැන සාකච්ඡා කරනවා.

සජිත් ප්‍රේමදාස,ගෝඨාභය රාජපක්ෂ,අනුර කුමාර දිසානායක යන ප්‍රධාන ජනපති අපේක්ෂකයින් තිදෙනා සමඟින් සාකච්ඡා කිරීමට සූදානමින් සිටිනවා. ඒ වගේම මේ තාක් ජනාධිපතිවරණයට ඉදිරිපත්ව සිටින කිසිම අපේක්ෂකයෙක් නිල සාකච්ඡාවක් සඳහා දෙමළ ජාතික සන්ධානයට ඇරයුම් කරල නැහැ" යැයි ද සම්බන්ධන් මහතා කීය.