(අංජුල මහික වීරරත්න)

එක්සත් ජාතික පෙරමුණේ නායක රනිල් වික්‍රමසිංහ මහතාට අග්‍රාමාත්‍ය ධුරය දෙන ලෙසට බල කරමින් කොළඹට එන ජන බල මෙහෙයුමේ සංවිධාන කටයුතු සඳහා එක්සත් ජාතික පෙරමුණේ සියලුම මන්ත්‍රීවරුන් මේ සති අන්තයේ තම මැතිවරණ බල ප්‍රදේශවල සංවිධාන කටයුතුවල නිරත වන ලෙස දැනුම් දී ඇත.

ඒ අනුව දෙසැම්බර් 08 සහ 09 යන දින දෙක ජන බල මෙහෙයුම සඳහා ජනතාව පෙළ ගැස්වීමට යොදා ගැනීමට එක්සත් ජාතික පෙරමුණේ නායකයින්ගේ සහභාගීත්වයෙන් පැවැති රැස්වීමේදී තීරණය විය.

පාර්ලිමේන්තුවේ බහුතර සහය ලබන රනිල් වික්‍රමසිංහ මහතාට අගමැති ධුරය දෙන ලෙස බල කරමින් දින තුනක් පුරා ජන බල මෙහෙයුම ක්‍රියාත්මක කිරීමට එක්සත් ජාතික පෙරමුණේ නායකයින් මීට පෙර තීරණය කර තිබිණි.

ජන බල මෙහෙයුමේ අවසන් දිනයේදී ලක්ෂ දෙකක ජනකායක් සමඟ කොළඹට ඇතුළුවන බවත් ජන බල මෙහෙයුමේ ගමනාන්තය එදින පස්වරු 2.00ට මෙහෙයුමට සහභාගී වන ජනතාවට දැනුම්දෙන බවත් එක්සත් ජාතික පක්ෂ ගාලු දිස්ත්‍රික් නායක වජිර අබේවර්ධන මහතා පැවැසීය.