(දයාරත්න ඇඹෝගම)
 
විලච්චිය ඇත්දල්කල්ල රාහුල විද්‍යාලයේ ගුරුවරියකගේ කනට පහරදී බරපතල තුවාල කර පලාගොස් ඇතැයි  කියන එම ප්‍රදේශයේම පාසලක සේවය කරන ගුරුවරයෙකු අත්අඩංගුවට ගැනීම සඳහා විමර්ශන  ආරම්භ කර ඇතැයි විලච්චිය පොලිසිය කියයි.
 
ගුරැවරිය මේ වනවිට අනුරාධපුර ශික්ෂණ රෝහලේ ප්‍රතිකාර ලබන බව පොලිසිය පවසයි.
 
පහර කෑමෙන් බරපතල තුවාල ලබා ඇත්තේ විලච්චිය ඇත්දල්කල්ල රාහුල විද්‍යාලයේ ගීතා රංගනී පොන්සේකා නැමැති 53 හැවිරිදි ගුරුවරියකි. 
 
විලච්චිය සිද්ධාර්ථ විද්‍යාලයේ පාසල් කිහිපයක් අතර පැවැති ක්‍රීඩාතරගය අතරතුරදී සාලියමාලා පාසලේ ක්‍රීඩා ගුරුවරයෙකු විසින් මෙම ගුරුවරියට පහරදි ඇතැයි මේ පිළිබඳව පරීක්ෂණ පවත්වන විලච්චිය පොලිසිය කියයි.
 
තමාට පහර දුන් ගුරුවරයා තමා ක්‍රීඩාපිටියේ සිටිනවාට වැඩි කැමැත්තක් දැක්වූයේ නැති බවත්, ක්‍රීඩාපිටියෙන් ඉවත්වන්නැයි බලපෑම් කළ බවත්, එයට තමන් එකඟ නොවූ නිසා පහර දුන් බවත් ගුරුවරිය පැවසුවාය.
 
සැකකාර ගුරැවරයා ප්‍රදේශයෙන් පලා ගොස් ඇති බවත් ඔහුව අත් අඩංගුවට ගැනීම සඳහා පොලිස් නිලධාරීන් කණ්ඩායමක් යොදවා ඇති බවත්  විලච්චිය පොලිසිය පවසයි.