(නිමල කොඩිතුවක්කු)

මොරගහකන්ද වාරි ව්‍යාපෘතියට අයත් අනෙක් ජලාශය වූ කළු ගඟ ජලාශයේ කටයුතු සම්පූර්ණයෙන් අවසන් කර ලබන මාසය වන විට එහි පූර්ණ ප‍්‍රතිලාභ ගොවි ජනතාවට ලබාදිය හැකි බව ජනාධිපති මෛත‍්‍රීපාල සිරිසේන මහතා පැවැසීය.

එමෙන්ම එම ව්‍යාපෘතියට අයත් ප‍්‍රධාන ඇළ මාර්ගය වූ වයඹට ජලය ගෙන යන වයඹ ඇළ, නැගෙනහිරට ජලය ගෙන යන ඉහළ ඇළහැර සහ මිණිපේ ඇළ සංවර්ධන කටයුතු ද මේ වන විට කඩිනමින් සිදුවන බවත් ජනාධිපතිවරයා  සඳහන් කළේය.

මහවැලිය - සංහිඳීයාවේ ගංඟාව සහ 95 න් පසු මහවැලි ග‍්‍රන්ථ ද්වය ජනගත කිරීම වෙනුවෙන් අද (24) පස්වරුවේ කොළඹ බණ්ඩාරනායක ජාත්‍යන්තර සම්මන්ත‍්‍රණ ශාලාවේ  පැවැති උත්සවයක් අමතමින් ජනාධිපතිවරයා  මේ බව ප‍්‍රකාශ කළේය.

95 සිට 2010 දක්වා මහවැලි සංවර්ධන ව්‍යාපාරය ඇසුරේ සිදු කළ අති විශාල වැඩකොටස පිළිබඳ ලේඛනගත ප‍්‍රකාශනයක් නොමැතිවීමේ අඩුව සපුරාලීමට 95 න් පසු මහවැලිය ග‍්‍රන්ථය සම්පාදනය කර තිබේ.

කඳුරට, රජරට, උතුරු නැගෙනහිර මතු නොව අද වයඹත් සිය දියවරින් එක සේ තෙමාලමින් සුවහසක් සිංහල දෙමළ මුස්ලිම් ජනතාවගේ සා පවස නිවාලන මහා ගංගාවේ ගමන මහවැලිය - සංහිඳියාවේ ගංගාව, ග‍්‍රන්ථය තුළ අන්තර්ගතය.

ග‍්‍රන්ථ සම්පාදක මණ්ඩලයේ සභාපති, ශ‍්‍රී ලංකා පදනම් ආයතනයේ සභාපති, ජනාධිපති නීතිඥ සරත් කෝංගහගේ සහ ග‍්‍රන්ථ ද්විත්වයේ ප‍්‍රධාන සංස්කාරක කේ. ආරියතුංග යන මහත්වරුන් ඇතුළු සම්පාදක මණ්ඩලය විසින් මෙහිදී ග‍්‍රන්ථ ද්විත්වය ජනාධිපතවරයා  වෙත පිළිගැන්වීය.

මෙහිදී අදහස් දැක්වූ ජනාධිපතිවරයා වැඩිදුරටත් සඳහන් කළේ සතළිස් වසරක් පුරා කි‍්‍රයාත්මක මහවැලි සංවර්ධන වැඩසටහන මෙරට ජාතික ආර්ථිකයට පුළුල් දායකත්වයක් ලබා දුන්නා සේම එය රටේ හෙට දවස වෙනුවෙන් කි‍්‍රයාත්මක නිමා නොවන පුනරාගමන කි‍්‍රයාවලියක් බවයි.

මහවැලි දියවරෙන් මහපොළෙව තෙත් කරන එම යෝධ කි‍්‍රයාන්විතයේ සුවිශේෂි ව්‍යාපෘතියක් වූ මොරගහකන්ද - කළු ගඟ ව්‍යාපෘතිය මුළු මහත් ශ‍්‍රී ලාංකේය ඉතිහාසයේ කි‍්‍රයාත්මක වූ සුවිසල් කෘෂිකාර්මික සංවර්ධන ව්‍යාපෘතිය ලෙස දේශයේ ප‍්‍රගමනය සඳහා නිම කරන්නට ලැබීම තම ජීවිතයේ ලද භාග්‍යයක් බව ද ජනාධිපතිවරයා එහිදී  කියා සිටියේය.

ජලය සහ භූමිය බෙදාගත නොහැකිව මහපොළව ගොවීන්ගේ රුධිරයෙන් තෙත් වූ අවස්ථා තමා ද දැක ඇති බවත් පැවසූ ජනාධිපතිවරයා වැඩිදුරටත් ප‍්‍රකාශ කළේ වියළි කලාපීය ගොවි ජනතාවගේ දීර්ඝ කාලීන ගැටලුවකට විසඳුම් ලබාදෙමින් මොරගහකන්ද කළු ගඟ මහා ව්‍යාපෘතිය ජාතියට දායාද කිරීමට හැකි වූ බවයි.

රජරට ගොවි ජනතාව වෙනුවෙන් තමා දුටු දීර්ඝකාලීන සිහිනයක් වූ මොරගහකන්ද ව්‍යාපෘතිය යතාර්ථයක් කර ගැනීම වෙනුවෙන්  සහ එදා මෙදා මහවැලිය වෙනුවෙන් කැපවී කටයුතු කළ ප‍්‍රධාන ඉංජිනේරුවාගේ සිට සැලසුම් ශිල්පින්, තාක්ෂණික ශිල්පීන් මෙන්ම අවසාන කම්කරුවා දක්වා සියලුදෙනාට තම ගෞරවය පුද කරන බවද ජනාධිපතවරයා එහිදී පැවැසීය.

ජල කළමනාකරණයේ විශේෂඥයෙකු සහ 1976 සිට වරින් වර මහවැලියට එක්ව කටයුතු කළ ආචාර්ය එම්.යූ.ඒ. තෙන්නකෝන් මහතා මෙම උත්සවයේ ප‍්‍රධාන දේශනය සිදු කරන ලදී.

ගාමිණි ජයවික‍්‍රම පෙරේරා, පී. දයාරත්න, නිමල් සිරිපාලද සිල්වා, මහින්ද අමරවීර, වීරකුමාර දිසානායක, ශාන්ත බණ්ඩාර යන මහත්වරුන් ඇතුළු මහවැලියට සම්බන්ධව කටයුතු කරන සහ කළ මැති ඇමතිවරු රැසක් ද, ජනාධිපති ලේකම් උදය ආර්. සෙනෙවිරත්න, මහවැලි සංවර්ධන හා පරිසර අමාත්‍යාංශයේ ලේකම් අනුර දිසානායක යන මහත්වරුන් සහ රාජ්‍ය නිලධාරීන් විද්වතුන් ඇතුළු පිරිසක් උත්සවයට එක්ව සිටියහ.