( තිළිණි ද සිල්වා සහ රංජන් කටුගම්පොළ )

බුවනෙකබා රජ සමයට අයත් බවට සැළකෙන කුරුණෑගල පෞරාණික රාජ සභා ගොඩනැගිල්ලක් කඩා ඉවත් කිරීමේ සිද්ධිය සම්බන්ධයෙන් කුරුණෑගල නගරාධිපති තුෂාර සංජීව විතාරණ මහතා ඇතුළු 5 දෙනෙකු අත්අඩංගුවට ගන්නා ලෙස දන්වමින් නිකුත් කර තිබෙන වරෙන්තු ක්‍රියාත්මක කිරීම වළක්වාලමින් තහනම් නියෝග නිකුත් කිරීමේ සිද්ධියට අදාළ පෙත්සම් සම්බන්ධයෙන් වන විරෝධතා ගොනු කිරීමට ලබන නොවැම්බර් 12 වැනිදා තෙක්  නීතිපතිවරයා ඇතුළු වගඋත්තරකරුවන්ට කල් ලබා දීමට අභියාචනාධිකරණය අද (14) නියම කෙරිණි.

මෙම පෙත්සම් අභියාචනාධිකරණ සභාපති විනිසුරු ඒ. එච්. එම්. ඩී. නවාස් සහ සෝභිත රාජකරුණා යන මහත්වරුන්ගෙන් සමන්විත විනිසුරු මඩුල්ල හමුවේ කැදවිණි.

ඊයේ පෙත්සම කැඳවූ අවස්ථාවවේදී තමන්ට කල් ලබා දෙන්නැයි නීතිපතිවරයා කළ ඉල්ලීමක් පිළිගනිමින්   විරෝධතා ඉදිරිපත් කිරීම සඳහා නීතිපතිවරයා ඇතුළු වගඋත්තරකරුවන්ට නොවැම්බර්  12 වැනිදා දක්වා කල් ලබා දෙන ලදී.

පෙත්සම් ඉදිරිපත් කළ කුරුණෑගල නගරාධිපති ඇතුළු පිරිස අභියාචනාධිකරණය හමුවේ කියා සිටින්නේ කඩා ඉවත් කළ බව කියන ගොඩනැගිල්ල පුරාවිද්‍යාත්මක ස්මාරකයක් වශයෙන් පුරාවිද්‍යා පනත යටතේ ගැසට් නිවේදනයකින් ප්‍රකාශයට පත්කර නොමැති බවයි.

එබැවින් තමන් ඇතුළු පිරිස අත්අඩංගුවට ගන්නා ලෙස කුරුණෑගල මහේස්ත්‍රාත් අධිකරණය විසින් නිකුත් කර තිබෙන වරෙන්තුව නීතිමය වශයෙන් බල ශූන්‍ය නියෝගයක් යැයි පෙන්වා දෙන පෙත්සම්කරුවන් එය බල රහිත කිරීමේ රිට් ආඥාවක් නිකුත් කරන ලෙසද අභියාචනාධිකරණයෙන් ඉල්ලා තිබේ.

ඒ අනුව, කුරුණෑගල මහේස්ත්‍රාත් අධිකරණය මගින් නිකුත් කර තිබෙන වරෙන්තු ක්‍රියාත්මක කිරීම වළක්වාලමින් අභියාචනාධිකරණය විනිසුරු මඩුල්ල විසින්  ඉකුත් අගෝස්තු 25 වැනිදා අතුරු  නියෝගයක් නිකුත් කළ අතර එය මෙම රිට් පෙත්සම් විභාගයට ගෙන අවසන් වනතුරු බලපැවැත්වේ.