(අජන්ත කුමාර අගලකඩ)

කැබිනට් රැස්වීම ලබන අඟහරුවාදා සිට උදේ 8.30 ට පැවැත්වීමට ජනාධිපති මෛත්‍රීපාල සිරිසේන මහතා තීරණය කර ඇතැයි වාර්තාවේ.

කැබිනට් රැස්වීම උදේ 7.30 ට පැවැත්වුවද ඇමැතිවරුන් ප්‍රමාද වී පැමිණීම නිසා මෙම තීරණය ගෙන ඇති බව දැනගන්නට ඇත.

ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් අද (13) උදේ 7.30 ට කැබිනට් මණ්ඩලය රැස්වූවද ආරම්භක අවස්ථාවේ සිට ඇත්තේ ඇමැතිවරුන් හතර පස්දෙනෙකු පමණක් බවද ආරංචි මාර්ග කියයි.

එහිදී අදහස් දක්වා ඇති ජනාධිපති මෛත්‍රීපාල සිරිසේන මහතා පවසා ඇත්තේ ඇමැතිවරුන්ට කැබිනට් රැස්වීමට සහභාගී වී අමාත්‍යංශ වලට යාමට හැකි බැවින් කැබිනට් රැස්වීම උදේ 7.30 ට කැඳවූ බවයි.

එහෙත් ඇමැතිවරුන් එන්නේ ප්‍රමාද වී නම් කැබිනට් රැස්වීම උදේ 8.30 ට පවත්වන බව ජනාධිපතිවරයා සඳහන් කර ඇත.

කැබිනට් රැස්වීම අඟහරුවාදා පෙරවරු 9.30 ට මුලදී පැවැත්වූවද එය උදේ 7.30 ට පවත්වන්නට ජනාධිපතිවරයා මීට සති කිහිපයකට පෙරදී තීරණය කළේය.

එහෙත් පසුගිය සති කිහිපයේම කැබිනට් මණ්ඩලය උදේ 7.30 ට රැස්වූවද ආරම්භක අවස්ථාවේ ඇමැතිවරුන් සහභාගී වී ඇත්තේ හතර පස් දෙනෙකු බවත් ඇමැතිවරුන් වැඩි දෙනෙකු පැමිණ ඇත්තේ කැබිනට් රැස්වීම ආරම්භ වී පැය භාගයකට පැයකට පමණ පසුව බවත් වාර්තා වේ.

මේ තත්ත්වය සැලකිල්ලට ගනිමින් කැබිනට් රැස්වීම ලබන සතියේ සිට උදේ 8.30 ට කැඳවීමට ජනාධිපතිවරයා තීරණය කර ඇතැයි වාර්තාවේ.