(ජයන්ත සමරකෝන්)

දැනට පුනරුත්ථාපනලාභීන් බාරනොගන්නා කන්දකාඩු පුනරුත්තාපන හා ප්‍රතිකාර මධ්‍යස්ථානය ලබන මස මුල සිට නැවත ආරම්භ කරන බව කොමසාරිස් ජනරාල් කාර්යංශය පවසයි.

කොවිඩ් -19 වසංගත තත්ත්වය හා ආසාදිතයින් හඳුනා ගැනීම හේතුවෙන් අධිකරණ නියෝග මත පුනරුත්තාපනයට යොමු කෙරුණූ මත්ලෝලී රැඳවියන් බාරගැනීම පසුගිය ජුලි මාසයේ සිට නතර කර ඇතැයි එහි කොමසාරිස් ජනරාල් මේජර් ජනරාල් දර්ශන හෙට්ටිආරච්චි මහතා අද (11) පැවසීය.

දැනට කෝවිඩ් 19 ආසාදිතයින් 11 ක් එහි ප්‍රතිකාර ලබන බැවින් ඔවුන් පිටව ගිය පසු පුනරුත්ථාපනය සඳහා මත්ලෝලී රැඳවියන් බාරගන්නා බවද ඒ මහතා කීය.

මේ වන විට වසරක පුනරුත්ථාපන කාලයක් සඳහා මත්ලෝලීන් 899 ක් රඳවා ඇතැයි ද 2013 සිට මේ දක්වා 6000 කට අධික මත්ලෝලීන් පිරිසක් සමාජගත කර ඇතැයි ද හෙතෙම සඳහන් කළේය.

කන්දකාඩු හා සේනපුර මත්ලෝලී රැඳවියන් පුනරුත්ථාපනය කරන දිවයිනේ එකවර 1000 ක් පුනරුත්ථාපනය කරන එකම මධ්‍යස්ථාන දෙක බවද එම කාර්යාංශය පවසයි.