බිඟුන් මේනක ගමගේ 

කන්තලේ බස් රථ අනතුර වාර්තා කිරීමට ගිය මාධ්‍යවේදී රොෂාන් කුමාර මාධ්‍යවේදියාට තම රාජකාරිය ඉටු කිරීමට ඉඩ නොදී කළ තර්ජනය ගැන අපක්ෂපාතී පරීක්ෂණයක් කරන්නැයි රජයෙන් ඉල්ලා සිටින බව නිදහස් මාධ්‍ය ව්‍යාපාරය නිවේදනයක් නිකුත් කරමින් පවසයි.

ත්‍රිකුණාමලයේ ප්‍රාදේශීය දේශපාලනඥවරියක හා ඇගේ පුත්‍රයා විසින් මෙසේ මාධ්‍යවේදියාට තර්ජනය කරනු ලැබ ඇතැයි ද එම බාධාකිරීම් සඳහා රාජකාරියේ නිරතව සිටි පොලිස් නිලධාරියකු පවා යොදාගෙන ඇතැයි ද නිදහස් මාධ්‍ය ව්‍යාපාරය චෝදනා කරයි.

මහජනතාවට සත්‍ය වාර්තා කිරීමට වගකීමෙන් බැඳී සිටින මාධ්‍යවේදීන්ට අඩන්තේට්ටම් කිරීමෙන් නොනැවතී පොලිස් නිලධාරින්ට පවා රාජකාරි කිරීමට ඉඩ නොදීම බරපතල අනතුරක් යැයි නිදහස් මාධ්‍ය ව්‍යාපාරය සඳහන් කරයි.

ඒ අනුව මාධ්‍යවේදීන්ට හිංසනයෙන් තොරව සිය රාජකාරි කිරීම සඳහා අවස්ථාව සැකැසීමට බලධාරින් කටයුතු කළ යුතු යැයි ද එම නිවේදනයේ වැඩිදුරටත් සඳහන් වේ.