(බිමල් ශ්‍යාමන් ජයසිංහ)

රුපියල් කෝටි 200 කට අධික වටිනාකමකින් යුත් හෙරොයින් මත්කුඩු තොගය සහ මිලිමීටර් නවය වර්ගයේ නවීන පිස්තෝල ප්‍රවාහනයට යොදාගත් බව කියන කැබ් රථය අද (03) කොළඹ ප්‍රදේශයේදී සොයාගත් බව පෑලියගොඩ දිසා අපරාධ කොට්ඨාසය කියයි.

බස්නාහිර උතුර පළාත භාර ජ්‍යෙෂ්ඨ පොලිස්පතිවරයාට ලද තොරතුරකට අනුව විශේෂ පොලිස් කණ්ඩායමක් සැකකාරියන් දෙදෙනෙකු සහ සැකකරුවෙකු සමඟ ඉකුත් 30 වැනිදා බණ්ඩාරගම ගැලනිගම නිවසක සඟවා තිබූ  මත්කුඩු තොගය හා ගිනිඅවි සොයා ගනු ලැබීය.

මත්කුඩු සමඟ අත්අඩංගුවට ගත් පොකුණුවිට කුළුපන පදිංචි 28 හැවිරිදි කාංචනා ප්‍රියදර්ශනී , සැකකරියගේ සහෝදරයා වූ 26 හැවිරිදි ධනංජය ධර්මකුමාර , සැකකරුගේ බිරිඳ 21 හැවිරිදි උපේක්ෂා පියුමි යන තිදෙනා ඉකුත් 30 වැනිදා පානදුර අධිකරණයේ වැඩ බලන මහේස්ත්‍රාත් රමනි ද සේරම් මහත්මිය වෙත ඉදිරිපත් කිරිමට අවසර ලබාදුන් බව පොලිසිය කියයි.

එම සැකකරුවන්ගෙන් සිදුකළ ප්‍රශ්න කිරිම් වලදී හෙළි වු තොරතුරු මත මිරිස්සේ සිට බණ්ඩාරගම ගැලනිගම නිවසට මත්කුඩු හා ගිනිඅවි තොගය  ප්‍රවාහනය කරන ලද කැබ් රථය වාහන කුලියට ලබාදෙන ආයතනයක තිබියදී සොයා ගැනීමට හැකි වූ බව පොලිසිය කීය.

ප්‍රධාන සැකකරිය සහ සැකකරු යතුරු පැදියකින් යමින් සිටියදී ගැලනිගම ප්‍රදේශයේදී නවතා සිදුකළ පරීක්ෂාවේදී හෙරොයින් මත්කුඩු කිලෝ 15 ක් සමඟ අත්අඩංගුවට ගැනීමෙන් පසු කරන ලද ප්‍රශ්න කිරීමේදී අනාවරණය වූ තොරතුරු අනුව ගැලනිගම පිහිටි නිවස වටලනු ලැබූ බව පොලිසිය කියයි.

එම නිවස තුළ තිබූ හොරොයින් මත්කුඩු කිලෝ 177 සොයා ගැනීමෙන් පසු කරන ලද සෝදිසි මෙහෙයුමකදී නවීන පන්නයේ ගිනිඅවි සහ මැගසින් සොයාගැනීමට හැකිවී තිබේ.

කෝටි 700 ක නිල් දියමන්ති කොල්ලකෑමේ සිද්ධියට රිමාන්ඩ් භාරයේ පසුවන කැලුම් ඉන්දික නොහොත් කැවුමා මෙම නිවස කුලී පදනම මත රැගෙන තිබූ බවට ප්‍රශ්න කිරීම් වලදී අනාවරණය වී තිබේ.

මෙම හෙරොයින් තොගය ඉරානයේ සිට මුහුදු මගින් මෙරටට ගෙන්වා ඇති බවත් මිරිස්සේ සිට අධිවේගි මාර්ගය ඔස්සේ බණ්ඩාරගම ගැලනිගම නිවසකට ප්‍රවාහනය කර තිබූ බව පොලිසිය පැවසීය.