(සිතුම් චතුරංග සහ රොමේෂ් මධුසංඛ)


ඉන්දියාවේ සිට ඩිංගි යාත්‍රාවකික් මෙරටට රැගෙනවිත් තිබූ රුපියල් කෝටි දෙකකට අධික වටිනාකමින් යුත් කේරළ ගංජා කිලෝ 144 යි ග්‍රෑම් 400 සමඟ ධීවරයකු පලෙයි තාලෙඅඬි වෙරළ තීරයේදී අත්අඩංගුවට ගත් බව පලෙයි පොලිසිය කියයි.

මහ පරිමාණ මත්ද්‍රව්‍ය ජාවාරමක් සම්බන්ධයෙන් නාවික හමුදාව වෙත ලැබුණ තොරතුරක් මත පලෙයි පොලිසිය හා එක්ව සිදුකළ වැටලීමකදී සැකකරු හා කේරළ ගංජා සහිත ඩිංගි යාත්‍රාව අත්ඩංගුවටගත් බව පැවසීය.

යාත්‍රාවේ තිබී විශාල පොලිතින් මළු හතරක් තුල මෙම කේරළ ගංජා ආරක්ෂිත ලෙස සඟවා තිබියදී සොයාගත් බවද පොලිසිය සඳහන් කළේය.

පොලිසිය පැවසූයේ සැකකරු ධිවර කටයුතු සඳහා මුහුදු යන මුවාවෙන් ඉන්දියාවට ගොස් කේරළ ගංජා රැගෙනවිත් ඇති බවත් එම කේරළ ගංජා මාළු ප්‍රවාහනය කරන අයුරින් විවිද ප්‍රදේශවලට රැගෙනයාමට සූදානම්කර තිබූ බවට තොරතුරු අනාවරණයවූ බවත්ය.

අත්අඩංගුවට ගත් සැකකරු පලෙයි , වත්තිරායන් දකුණ ප්‍රදේශයේ පදිංචි වයස අවුරුදු 38 පුද්ගලයකු වේ.

සැකකරු හා කේරළ ගංජා තොගය කිලිනොච්චිය මහෙස්ත්‍රාත් අධිකරණයට ඉදිරිපත් කිරීමට නියමිතය.

(ඡායාරූපය- සිතුම් චතුරංග)

(ඡායාරූපය - රොමේෂ් මධුශංක)