( තිළිණි ද සිල්වා )

කටුනායක ගුවන් මගී මෙහෙයුම් ඩිජිටල්කරණයට ලක් කරමින් ගුවන් යානා නැවැත්වීමේ  හැකියාව දෙගුණයක් කරන  බව  ගුවන් සේවා හා ආයෝජන කලාප රාජ්‍ය  අමාත්‍ය  ඩී.වී.චානක මහතා අද (07) පැවසීය.

ඒ අනුව මගීන් පරීක්ෂාව සදහා ස්පර්ෂ රහිත කියෝස්ක් තාක්ෂණය , ,ස්වයං ගමන් මලු‍ සලකුණු කිරීම් , නව ජංගම බෝඩිං බලපත්රීයක් ,  මුහුණු හදුනා ගැනීමේ සත්යාාපනය, කෘතිම බුද්ධිය මගී පහසුවට මුසු කිරීම , ගුවන් යානා නැවැත්වීමේ හැකියාව 26 සිට 49 දක්වා ඉහලට නැංවූ බව ද රාජ්‍ය  අමාත්‍යවරයා වැඩිදුරටත් පැවසීය.

 ආගමන විගමන දෙපාර්තමේන්තුවේ තොරතුරු තාක්ෂණ පද්ධතිය සමග මගීන් ගේ ඇතුලත් වීමේ තොරතුරු ඒකාබද්ධ කරන බවත් ඒ තුලින් කඩදාසි රහිත ස්පර්ෂ රහිත අපහසුතාවයකින් තොර ස්වයං සේවා ගුවන් ගමනක් ලබාදීම මෙම වැඩපිළිවෙලේ අපේක්ෂාව බවද ඩී.වී.චානක අමාත්‍යවරයා කීවේය.

දියුණු ගුවන්තොටුපලක ඇති නවීන තාක්ෂණය මුසු වූ සියළු ක්‍රියාකාරකම් කටුනායක ගුවන්තොටුපල තුලද ස්ථාපිත  කිරීම හරහා සෑම ගුවන් මගියෙකුටම ඉතාමත් පහසුවෙන් හා වඩාත් කාර්යක්ෂමව තම සේවාවන් ඉටුකර ගත හැකි බවද හෙතෙම වැඩිදුරටත් කියා සිටියේය.

තරුණ කටයුතු සහ ක්‍රීඩා අමාත්‍ය හා ඩිජිටල් තාක්ෂණ හා ව්‍යවසාය සංවර්ධන රාජ්‍ය අමාත්‍ය  නාමල් රාජපක්ෂ මහතාගේ සහය මත ගුවන් සේවා හා ආයෝජන කලාප සංවර්ධන රාජ්‍ය අමාත්‍යාංශය මෙම වැඩසටහන ක්‍රියාවට නංවන බවද රාජ්‍ය  අමාත්‍යවරයා පෙන්වා දුන්නේය.

නව වැඩසටහනට අනුව ස්වයංක්‍රීකරණය භාවිතය ඉහල දැමීම හරහා   ගුවන් මගීහූ නිලධාරීන් අතින් හැසිරවීම අවම වීමත් , සියළු ගුවන් මගීන්ට තම කාර්යයන් විනිවිද භාවයෙන් යුතුව කාර්යක්ෂමව සිදු කරගැනීමට මේ අනුව හැකි වේ.

මීට සමගාමීව ඉදිවන  නව ගුවන්යානා නැවැත්වීමේ අංගනය ඉදිකිරීම්ද අවසන් අදියරේ පවතින අතර  එය ලබන මස අවසානයට පෙර අවසන් කිරීමට නියමිත බවද රාජ්‍ය අමාත්‍යවරයා කීය.