(හිරාන් ප්‍රියංකර ජයසිංහ)
 
කොට්ටුකච්චිය කච්චිමඩුව ජලාශය නැවතත් වාන්දැමීම හේතුවෙන්, කුඹුරු අක්කර 50කට අධික ප්‍රමාණයක පවතින ගොයම් පැළ ජලයෙන් යටවී විනාශ වෙමින් පවතින බව ගොවීහු පවසති.
 
කච්චිමඩුව ජලාශයේ වාන් ජලය කිරල් ඔයට ගලායාම හේතුවෙන් එයද පිටාර ගැලීමට ලක්ව ඇතැයිද, මේ හේතුවෙන් දින 10ක් පමණ වන ලපටි ගොයම් පැළ කුණු වී මැරී යාමේ අවදානමට ලක්ව ඇතැයිද ඔවුහු කියාසිටිති.
 
මේ පිළිබඳව අදහස් දැක්වූ ජයන්ත රෝෂාන් මහතා පවසා සිටියේ මෙවැන්නකි.
 
“කොට්ටුකච්චිය වම් ඉවුරේ, නවදැල්ල කොටසේ අක්කර 50 ක් විතර  දින 5කට වැඩියෙන් කච්චිමඩුව ජලාශයේ වාන් ජලයෙන් යට වෙලා. අපිට කලින් වගාකරන්න කියලා දැනුම්දීලා තිබෙන නිසා අපි වගා කළා. නමුත් මේ වන විට අපේ කුඹුරුවල ගොයම් පැළ කුණුවෙන්න අරගෙන. අක්කරයක් වගා කරන්න අපිට බිත්තර වී වලටත් එක්ක රුපියල් 40,000 කට වඩා වැඩියෙන් වැයවෙලා” යැයි කීය.
 
මේ පිළිබඳව අදහස් දක්වමින් සිටි කේ. පී. නිශාන්ත මහතා මෙසේ පැවසීය.
 
“මේ ජලය බැහැලා යන්න විදිහක් නැත්තේ ගල්කුලමේ ඉදල මුරියාකුලමට යන්න තිබෙන මාර්ගයේ බෝක්කු කිහිපයම සම්පූර්ණයෙන් වසා දමා තිබෙන නිසායි. මේනිසා ජලය බැසයන්න නිසි ක්‍රමයක් නැති වෙලා” යැයිද සඳහන් කළේය.
 
පුත්තලම ප්‍රාදේශීය ඉංජිනේරු දිලිප හෙට්ටිආරච්චි මහතා මේ සම්බන්ධයෙන් මෙසේ අදහස් දැක්වීය.
 
“ ජලයෙන් පිරුණු කුඹුරු කොටසක් බලන්න මම ගියා. එහි ගැටලුවක් ඇති බව පෙනුනා. කිරල් ඔයේ ස්ථාන කිහිපයක් අවහිර කරලා. ජලය ගලායාම වළක්වා ඇතැයි කියන ස්ථාන සම්බන්ධයෙන් ඉදිරියේදී ක්‍රියාමාර්ග ගන්නවා” යැයිද කීය.