(බිඟුන් මේනක ගමගේ)
 
මාළිගාවත්ත වකුගඩු මධ්‍යස්ථානයේ ඖෂධයක හිඟකම නිසා රුධිර කාන්දුපෙරණ රෝගීන් දැඩි අපහසුතාවයකට පත්ව සිටිතැයි එහි විශ්වසනීය ආරංචි මාර්ග සඳහන් කරයි.
 
අවශ්‍ය තොග නොමැතිවීමෙන් මෙසේ හිඟව ඇත්තේ රුධිර කාන්දුපෙරණය සඳහා භාවිත කරන රසායනික දියරයක් යැයි මාළිගාවත්ත වකුගඩු මධ්‍යස්ථානයේ ප්‍රකාශකයෙක් ‘ලංකාදීප’ යට අද  (1) පැවැසීය. 

රුධිර කාන්දුපෙරණයේදී රෝගීන්ගේ රුධිරය පිරිසිදු වන්නේ යන්ත්‍රයට සවි කරන මෙම රසායනික දියරය මගින් යැයි එම ප්‍රකාශකයා කීය.

මාළිගාවත්ත වකුගඩු මධ්‍යස්ථානයේ අධ්‍යක්ෂවරයාගෙන් මේ ගැන විමසීමට අවස්ථා ගණනාවකදීම උත්සාහ කළ ද ඔහු දුරකථනයට සම්බන්ධ කරගත නොහැකි වූ අතර එහි රුධිර කාන්දුපෙරණ අංශයේ නිලධාරින් පැවැසුවේ අදහස් ප්‍රකාශ නොකරන හැටියට අධ්‍යක්ෂවරයාගෙන් තමන්ට උපදෙස් ලැබී ඇති බවය.

අදාළ ඖෂධය සපයන සමාගමෙන් සැපයුම් නතර කිරීම නිසා මෙම තත්ත්වය මතුව ඇතැයි ඔහු කීය.

මේ නිසා ඇතැම් අවස්ථාවල රෝගීන් පෞද්ගලික මට්ටමින් බාහිරව අදාළ ඖෂධය මිලදී ගෙන සිය රුධිර කාන්දුපෙරණයට කටයුතු කර ඇතැයි පැවැසේ.

බාහිරෙන් මිලට ගැනීමේදී අදාළ ඖෂධය රුපියල් දෙදහසක් පමණ වන අතර මේ වනවිට පෞද්ගලික අංශයේ ඇතැම් රෝහල් හා සමාගම්වලින් එම ඖෂධය අලෙවි නොකිරීම නිසා වකුගඩු රෝගීන් දැඩි දුෂ්කරතාවයට පත්ව ඇත.