(තිළිණි ද සිල්වා)
 
මඩකලපුව එරාවුර් ප්‍රදේශයේ නව නිදහස් වෙළඳ කලාපයක් ආරම්භ කිරීමට රජය සැලසුම් කර තිබෙන බව කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා අමාත්‍ය  ප්‍රසන්න රණතුංග මහතා පැවසීය.
 
මේ සඳහා ඉඩම් අක්කර 200 ක් දැනටමත් හඳුනාගෙන ඇති බවත්, ඒ සඳහා ආයෝජකයන් සෙවීමේ කටයුතු ද මේ වන විට සිදුකරමින් පවතින්නේ යැයිද අමාත්‍ය ප්‍රසන්න රණතුංග මහතා කියා සිටී.
 
මෙම නව නිදහස් වෙළඳ කලාපය සැකසීමට අදාළ පරිසර ඇගයිම් වාර්තා ලබා ගැනීමට මේවන විටත් අවශ්‍ය  පියවර ගෙන ඇතැයිද අමාත්‍ය ප්‍රසන්න රණතුංග මහතා පැවසීය.
 
නව නිදහස් වඳ  කලාපය ස්ථාපිත කළ පසු ඊට අදාළ යටිතල පහසුකම් රජය විසින් ලබා දෙන බවද කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා අමාත්‍යවරයා කියා සිටී.
 
මේවන විට දිවයින පුරා ආයෝජන මණ්ඩලයට අයත් කටුනායක, බියගම, කොග්ගලසීතාවකපුර, බිංගිරිය හා වගවත්ත ආදි ප්‍රදේශවල නිදහස් කලාප 15 ක් ස්ථාපනය කර තිබෙන අතර  එම නිදහස් වෙළඳ කලාප හා අපනයන සැකසුම් කලාපවල යටිතල පහසුකම් නැංවීමේ  කඩිනම් වැඩපිළිවෙළක් ආරම්භ කර ඇතැයි කාර්මික අපනයන, ආයෝජන ප්‍රවර්ධන, සංචාරක හා ගුවන් සේවා අමාත්‍යාංශය සඳහන් කරයි.
 
ඒ අනුව එම නිදහස් වෙළඳ කලාප ආශ්‍රිතව පානීය ජලය ඇතුළු වෙනත් පහසුකම් වැඩි දියුණු කිරීම සඳහා රජයේ අවධානය යොමුව ඇති අතර , දැනටමත් එම අවශ්‍යතා හඳුනාගෙන අමාත්‍යංශයට ඒ පිළිබඳ තමන්ට  වාර්තාවක් ලබා දෙනලෙස අදාළ අංශවලට උපදෙස් දී ඇති බව ඇමති ප්‍රසන්න රණතුංග මහතා කියා සිටී.