( තිළිණි ද සිල්වා සහ රංජන් කටුගම්පොළ )

උප්පැන්න ලියාපදිංචි කිරීමේ ලේඛනයේ "ජාතිය" සදහන් කිරීමට ඇති තීරුව හිස්ව තැබීමට  හෝ එම තීරුවේ "ශ්‍රී ලාංකික " ලෙස  සදහන් කිරීමට ඇති හැකියාව සොයා බලා වාර්තාවක් ඉදිරිපත් කරන ලෙස අභියාචනාධිකරණය අද (09) නීතිපතිවරයාට නියෝග කළේය.

තම දරුවාගේ උප්පැන්න ලියාපදිංචි කිරීමේ ලේඛනයේ  ජාතිය ලෙස" ශ්‍රී ලාංකික "යන්න  සදහන්  කරන ලෙස  කල ඉල්ලීමක් රෙජිස්ට්‍රාර් ජෙනරාල්වරයා  ප්‍රතික්ෂේප කිරීමට එරෙහිව  නීතිඥ නුවන් බෝපගේ මහතා  ගොනු කල රිට් පෙත්සමක්  පිළිබඳව  කරුණු  සලකා බැලූ අධිකරණය මෙම නියෝගය කලේය.

සෝභිත රාජකරුණා සහ ධම්මික ගනේපොල යන අභියාචනාධිකරණය විනිසුරු මඩුල්ල හමුවේ මෙම පෙත්සම කැඳවනු ලැබිණි .

එහිදී  පෙත්සම්කරු වෙනුවෙන් පෙනී සිටි ජනාධිපති නීතීඥ  රොමේෂ් ද සිල්වා මහතා එහිදී සදහන් කලේ මෙරට තුළ  සංහිඳියාව ඇති කිරීම සම්බන්ධයෙන්  නිරන්තරයෙන්  කතා බහට ලක්  වුවද උප්පැන්න ලියාපදිංචි කිරීමේ ලේඛනයේ ජාතිය  කුමක්දැයි සඳහන් කිරීම  මගින්  ජාතින්  ලෙස බෙදීමකට  ලක් කර ඇති බව ය.

ඒ වෙනුවට  එම තීරුවේ  ශ්‍රී ලාංකික ලෙස  සඳහන්  කල යුතු බවට ඒ මහතා  කරුණු ඉදිරිපත් කලේය.

එම කරුණු  සලකා බැලූ නීතිපති වරයා වෙත  ඉහත නියෝගය කළේය.

පෙත්සම පෙබරවාරි මස  17වැනිදා කැඳවීමට නියම කෙරිණ.

රජයේ නීතීඥ රජික අලුවිහාරේ  මහතා  නීතිපතිවරයා වෙනුවෙන් පෙනී සිටියේය.