(රොමේෂ් මධුෂංඛ)
 
රට තුළ පැවති වතාවරණය හේතුවෙන් උතුරු පළාතේ ආරක්ෂාව දැඩි කිරීමට පියවර ගෙන ඇති අතරම සැකකටයුතු ලෙස හැසිරුණු පුද්ගලයින් 20 කට අධික පිරිසක් ගෙවී ගිය දින දෙකක කාලය තුළදී අත්අඩංගුවට ගෙන ඇති බවට උතුරේ ආරක්ෂක අංශ පෙන්වා දෙයි.

මේ අතර වන්නි යුද හමුදා බුද්ධි අංශ වෙතට ලැබුණු තොරතුරකට අනුව වවුනියාව නගරයේ සියලුම වෙළඳසැල් වසා දමා නගරයේ සියලුම ස්ථාන හා පුද්ගලයින් සෝදිසි පරීක්ෂාවකට ලක්කෙරිණි.

එහිදී වව්නියාව නගරයේ සැකකටයුතු ලෙස හැසිරුණු පුද්ගලයින් 10 දෙනෙකු ප්‍රශ්න කිරීම් සඳහා අත්අඩංගුවට ගෙන වව්නියාව පොලීසිය වෙතට බාරදීමට පියවර ගෙන ඇත.

යාපනය දිස්ත්‍රීක්කයේ දී සිදු කරන ලද සෝදිසි මෙහෙයුම්වලදී ද සැකකටයුතු පුද්ගලයින් 7 දෙනෙකු ප්‍රශ්න කිරීම් සඳහා අත්අඩංගුවට ගෙන ඉන් 6 දෙනෙකු මුදා හැර ඇති අතර එක් සැකකරුවෙකු රක්ෂිත බන්ධනාගාර ගත කිරීමට පියවර ගෙන තිබේ.

කිලිනොච්චිය දිස්ත්‍රික්කයේද යුද හමුදාව විසින් පසුගිය දින කිහිපය තුළ සිදු කරන ලද සෝදිසි මෙහෙයුම් වලදී සැකකටයුතු පුද්ගලයින් 7 දෙනෙකු අත්අඩංගුවට ගෙන වැඩිදුර ප්‍රශ්න කිරීම් සඳහා කිලිනොච්චිය පොලීසිය වෙතට බාරදීමට පියවර ගෙන ඇත.

මේ අතර උතුරු පළාතට ඇතුළු වන හා උතුරෙන් පිටවන සියලුම වාහන පූර්ණ පරීක්ෂාවකට ලක් කිරීමට උතුරේ ආරක්ෂක අංශ විසින් පියවර ගෙන අතර ඒ සඳහා යුද හමුදාව, නිවාක හමුදාව හා පොලීසිය විසින් ස්ථාන කිහිපයකදී හදීසි සෝදිසි මුර පොළවල් යෙදීමට පියවර ගෙන ඇත.