ඉන්දියාවේ කොරෝනා වයිරසය ආසාදනය වූ පුද්ගලයන් සංඛ්‍යාව 60 දක්වා ඉහළ ගොස් ඇතැයි එරට සෞඛ්‍ය අමාත්‍යංශය සඳහන් කරයි.

රාජස්ථානයේ සහ දිල්ලියේ නව ආසාදිතයන් දෙදෙනෙකු වාර්තා වීමත් සමඟ මෙම ගණන ඉහළ ගොස් තිබේ.

ආසාදිතයන් 60දෙනා අතර ඉතාලි ජාතිකයන් 16දෙනෙකුද සිටින බව සෞඛ්‍ය අමාත්‍යංශය සඳහන් කරයි.

අද උදෑසන වනවිට දිල්ලියෙන් පුද්ගලයන් 5දෙනෙකු සහ උත්තර් ප්‍රදේශ්වලින් පුද්ගලයන් 9දෙනෙකු වාර්තා වී තිබිණි. කර්නාටක ප්‍රාන්තයෙන් සිව්දෙනෙකුටද මහාරාෂ්ට ප්‍රාන්තයෙන් දෙදෙනෙකුටද ලඩක් ප්‍රාන්තයෙන් දෙදෙනෙකුටද ආසාදනය වී ඇත. රාජස්ථානය, තෙලන්ගාන, තමිල්නාඩු, ජම්මු කාශ්මීරය සහ පන්ජාබ් යන ප්‍රාන්තවලින් ආසාදිතයන් එක බැගින් වාර්තා වී තිබේ.

පවතින තත්වය අනුව, වයිරසය ආසාදනය වූ බවට සැක පුද්ගලයකු දෙවරක් පරීක්ෂාවට ලක් කර ඒ බව තහවුරු කරගැනීමට බලධාරීහු කටයුතු කරමින් සිටිති.

කෙසේවෙතත්, රෝහල්වලට ඇතුළු වූ ආසාදිතයන්ගේ තත්වය සුව අතට හැරෙමින් පවතින බව සෞඛ්‍ය අමාත්‍ය හර්ෂ් වර්ධන් මහතා පැවසීය.

මේ අතර, ප්‍රංශය, ජර්මනිය සහ ස්පාඤ්ඤය යන රටවල සංචාරකයන්ට ද ඉන්දියාවට පැමිණීමේ තහනමක්ද පනවා තිබේ. ඉතාලිය, ඉරානය, දකුණු කොරියාව, ජපානය සහ චීනය යන රටවල සංචාරකයන්ට මීට ඉහතදී ඉන්දියාව වීසා අත්හිටුවා තිබිණි.

චීනය, හොංකොං, කොරියාව, ජපානය, ඉතාලිය, තායිලන්තය, සිංගප්පූරුව, ඉරානය, මැලේසියාව, ප්‍රංශය, ස්පාඤ්ඤය සහ ජර්මනිය යන රටවල සංචාරය කර ඉන්දියාවට පැමිණෙන ගුවන් මගීන්ට සති දෙකක ස්වයං නිරෝධායන කාලයකට යොමුවන ලෙසද සෞඛ්‍ය අමාත්‍යංශය උපදෙස් ලබා දී තිබේ.

එසේම, රැකියා කටයුතුවල නිරතවන්නන්ට නිවසේ සිට එම කටයුතු ඉටුකරගන්නා ලෙසද දැනුම් දී ඇත.

(ඉන්දියා ටුඩේ ඇසුරිනි)

16844