(වසන්ත චන්ද්‍රපාල)

අගමැති මහින්ද රාජපක්ෂ මහතාගේ උපදෙස් මත ආරක්ෂක ලේකම් විශ්‍රාමික මේජර් ජෙනරාල් කමල් ගුනරත්න, යුද හමුදාපති මේජර් ජෙනරාල් ශවේන්ද්‍ර සිල්වා, ශ්‍රිලංකා නාවික හමුදාපති වයිස් අද්මිරාල් පියල් ද සිල්වා , වැඩ බලන පොලිස්පති චන්දන තිලකරත්න යන මහත්වරු අද (14) අම්පාර දිස්ත්‍රික්කයේ ඓතිහාසික විහාරස්ථාන පිළිබඳව සොයා බැලීම සඳහා සංචාරයක නිරත වූහ.

පළමුව මෙම පිරිස දිඝවාපි පුරාණ රජමහාවිහාරයට පැමිණ දිඝවාපි පුරාණ රජමහා විහාරාධිපති මහඔය සෝභිත හිමියන්  සහ උතුරු නැගෙනහිර දෙපාළාතේ ප්‍රධාන අධිකරණ සංඝනායක අම්පාර මහාවාපි විහාරාධිපති අරන්තලාව බෞද්ධ මධ්‍යස්ථානාධිපති කිරිදිවැල සෝමරතන හිමියන් සමඟ දිඝවාපි පුදබිමේ වර්තමාන තත්වය පිළිබඳව සාකච්ඡා කළහ.

දැනට දිඝවාපි  පුදබිමේ ඉඩම් අක්කර 29 ක් අනවසරයෙන් අල්ලා ගෙන ඇති අතර එයට විරුද්ධව අක්කරපත්තුව මහේස්ත්‍රාත් අධිකරණයේ නඩුවක් පවතින බව සහ දීඝවාපි චෛත්‍ය ගොඩ නැගිම කඩිනම් කළයුතු  බව මෙහිදි විහාරාධිපති මහඔය සෝභිත හිමියන් ආරක්ෂක ලේකම් වරයාට දැනුම් දෙන්හ.

පසුව දීඝවාපි චෛත්‍ය බැලිමටද මෙම පිරිස ගිය අතර ඉදිරි සතිය තුලදි ආරක්ෂක අමාත්‍යංශයේ විශේෂ සාකච්ඡාක් පවත්වා මේ පිළිබඳව තීරණයක් ගන්නා බව සඳහන් කළේය.

ඉන් අනතුරුව දීඝවාපි නොරොච්චෝලේ ප්‍රදේශයේ ඉදිකර ඇති සුනාමි නිවාස පිළිබඳව සොයා බැලිමටද ආරක්ෂක ලේකම් කමල් ගුනරත්න මහතා පියවර ගනු ලැබිය.

වසර 12 ක් තිස්සේ වල්වැදි විනාශට පත්වෙමින් යන මෙම නිවාස පිළිබඳව ආරක්ෂක ලේකම්වරයාගේ දැඩි පරීක්ෂාවට ලක්විය.

පසුව මාණික්කමඩු පරිවාර චෛත්‍යයට ගිය ආරක්ෂක ලේකම් වරයා ඇතුලු පිරිස එම විහාරස්ථානයේ පවතින තත්වය පිළිබඳව සොයා බැලුහ.

මෙහිදි මාණික්කමඩු පරිවාර විහාරස්ථානයේ පවතින ඉඩම් ගැටලුව පිළිබඳව කිරිදිවැල සෝමරතන හිමියන් විසින් ආරක්ෂක ලේකම්වරයාට කරුණු පැහැදිලි කරනු ලැබූහ.

මානික්කමඩු රජමහා විහාරය ආරම්භ කිරිමට ගොස් තමන්  වහන්සේට සහ මාණික්කමඩු විහාරාධිකාරි අඹගස්පිටියේ සීලරත්න හිමියන්ට දින ගණන් පොලිසියේ ගත කිරිමට  සිදුවු බවද සෝමරතන හිමියන් මෙහිදි පැවසූහ.

දැනට මෙම විහාරස්ථානටය් පවතින ඉඩම් ගැටලුව පිළිබඳව අවදානය යොමුකර විසදුමක් ලබාදෙන ලෙසද උන් වහන්සේ මෙහිදි ඉල්ලිමක් කරනු ලැබූහ.

ජනාධිපති ගෝඨාභය රාජපක්ෂ මහතාගේ සහ අගමැති මහින්ද රාජපක්ෂ මහතාගේ උපදෙස් මත මෙම සංචාරයට සහාභාගි වු බවත් සංචාරයෙන් පසුව මේ පිළිබඳව  ජනාධිපතිතුමා සහ අගමැතිතුමා දැනුවත් කර ඉදිරි පියවර ගන්නා බවත් ආරක්ෂක ලේකම් කමල් ගුණරත්න මහතා මෙම සංචාරයේදි මහා සංඝරත්නයට දැනුම් දුන්නේය.

නැගෙනහිර ආණ්ඩුකාර අනුරාධා  යහම්පත් මහත්මියද මෙම අවස්ථාවට එක්ව සිටියේය.