(ඩයනා උදයංගනී)

අමරපුර, ශ්‍රී ධර්මරක්‍ෂිත මහා නිකායේ උත්තර මණ්ඩලයේ ජ්‍යෙෂ්ඨ සාමාජික, මහරගම, සිරි වජිරඥාන ධර්මායතනාධිපති අපවත් වී වදාළ අම්පිටියේ ශ්‍රී රාහුල හිමියන්ගේ ආදාහන පූජොත්සවය තිඹිරිගස්යාය හෙන්රි පේද්‍රිස් ක්‍රීඩාංගණයේදී අනිද්දා (20) සවස 3.00 ට සිදුකෙරේ.

උන්වහන්සේගේ දේහය මේ වන විට මහරගම සිරි වජිරඥාන ධර්මායතයේ තැන්පත් කර ඇති අතර එහි සිදුකෙරෙන පාංශුකූල කටයුතුවලින් පසු හෙට (19) සවස 1.00 ට හයිලෙවල් මාර්ගය ඔස්සේ බම්බලපිටිය සිරි වජිරාරාම විහාරස්ථානයට වැඩම කරවීමට නියමිතය.

ඉන්පසු උන්වහන්සේගේ දේහය මහජන ගෞරව සඳහා බම්බලපිටිය සිරි වජිරාරාම විහාරස්ථානයේ තැන්පත් කර තැබෙන අතර අනිද්දා (20) පස්වරු 1.00 ට එහිදී ද පාංශුකූල කටයුතු සිදුකෙරේ.

අනතුරුව දේහය පෙරහැරින් හෙන්රි පේද්‍රිස් ක්‍රීඩාංගණයට වැඩම කරවා සවස 3.00 ආදාහන කටයුතු සිදුකෙරේ.

වසර 106ක් ආයු වළඳා අපවත් වූ උන්වහන්සේ මෙරට ජීවතුන් අතර සිටි වයසින් වැඩිම භික්‍ෂූන් වහන්සේ බව ද වාර්තා වේ.

බම්බලපිටිය සිරි වජිරාරාමාධිපතිව වැඩ විසූ පැලෑනේ සිරි වජිරඥාන මහ නා හිමියන්ගේ ශිෂ්‍ය භික්‍ෂුවක් වූ අම්පිටියේ ශ්‍රී රාහුල හිමියෝ මඩිහේ පඤ්ඤාසීහ මහ නා හිමියන්ගේ පැවිදි සහෝදරයා ද වූහ.

මහරගම, සිරි වජිරඥාන ධර්මායතනය භික්‍ෂු පුහුණු ආයතනයක් ලෙස බවට පත්කිරීමට  මඩිහේ පඤ්ඤාසීහ මහ නා හිමියන් හා එක්ව කටයුතු කළේ ද අම්පිටියේ ශ්‍රී රාහුල හිමියන්ය.