(බිඟුන් මේනක ගමගේ) 
 
අගුණුකොලපැලැස්ස බන්ධනාගාරයේ රිමාන්ඩ් රැඳවියන් පිරිසකට පහරදීමේ සිදුවීම සම්බන්ධයෙන් අධිකරණමය ක්‍රියාමාර්ග ගන්නා බව සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා මහතා පැවසීය.
 
සිරකරු අයිතිවාසිකම් සුරැකීමේ කමිටුව මෙම සිදුවීම ගැන අපරාධ පරීක්ෂණ දෙපාර්තමේන්තුවට පැමිණිල්ලක් කළත් නිසි විමර්ශනයක් සිදු නොවන බවට චෝදනා කළ හෙතෙම එම නිසා මෙම තීන්දුව ගත් බව කීය.
 
ඒ අනුව නීතිපති, බන්ධනාගාර අධ්‍යක්ෂ ජනරාල් හා පොලිස්පති වගඋත්තරකරුවන් කරමින් මෙම සිදුවීම ගැන නිසි පියවර ගැනීමට මැන්ඩාමුස් රිට් ආඥාවක් ඉල්ලමින් අධිකරණයට පෙත්සමක් ගොනු කරන බව පෙරේරා මහතා සඳහන් කළේය. 
 
බන්ධනාගාර පරිශ්‍රයෙහිදී පිරිසක් පොලු මුගුරුවලින් පහර දෙන දර්ශන ඇතුළත් පැය භාගයක පමණ කාලයක් පුරා ධාවනය වන සී.සී.ටී.වී දර්ශන පවා තිබියදී වැරැදිකරුවන් ආරක්ෂා කරන ප්‍රතිපත්තියක් අනුගමනය වෙමින් පවතින බවට පෙරේරා මහතා චෝදනා කළේය. 
 
ප්‍රහාරයට අදාළ සී.සී.ටී.වී දර්ශන සහිත සාක්ෂි ලබාදුන් පාර්ශ්වයන්ගේ ජීවිතවලට දැනටම අවදානමක් මතුව ඇති බව ද නීතිඥ පෙරේරා මහතා වැඩිදුරටත් සඳහන් කළේය.