(** මාණ්ඩලික වාර්තාකරුවකු විසිනි)

අද පැවැත්වෙන එක්සත් ජාතික පෙරමුණේ පක්ෂ නායක රැස්වීමෙන් පසුව අග්‍රාමාත්‍ය රනිල් වික්‍රමසිංහ මහතා ධුරයෙන් ඉවත්වනු ඇතැයි එක්සත් ජාතික පෙරමුනේ ආරංචි මාර්ගවලින් පැවසෙයි.

ඉතාමත් විශ්වාස  කටයුතු ආරංචි මාර්ගවලින් දැනගන්නට ඇත්තේ අග්‍රාමාත්‍යවරයා අද (20) සවස විශේෂ ප්‍රකාශයක් නිකුත් කිරීමට නියමිත බවයි. ඔහුගේ ඉල්ලා අස්වීම අද රාත්‍රියේ හෝ හෙට දිනයේදී  සිදු වීමට නියමිත බවද එම ආරංචි මාර්ග කියයි.
 
අගමැතිවරයා මේ පියවර ගන්නේ භාරකාර ආණ්ඩුවක් යටතේ මහ මැතිවරණයක් සඳහා පසුබිම සැකසීමට බවද එම ආරංචි මාර්ග සඳහන් කරයි.

ආණ්ඩුක්‍රම ව්‍යවස්ථාව අනුව අග්‍රාමාත්‍යවරයා ධූරයෙන් ඉවත්වීමත් සමඟ කැබිනට් මණ්ඩලයද විසිරී යනු ඇත.
 
ජනාධිපති ගෝඨාභය රාජපක්ෂ මහතාගේ අනුමැතිය පරිදි නව අග්‍රාමාත්‍යවරයකු පත්කර අලුත් කැබිනට් මණ්ඩලයක් යටතේ මහමැතිවරණ තෙක් භාරකාර රජයක් පත්කරගැනීමට ඉඩ සැලසීම රනිල් වික්‍රමසිංහ මහතා අග්‍රාමාත්‍ය ධූරයෙන් ඉවත්වීමේ අරමුණ බව එක්සත් ජාතික පෙරමුණු ආරංචි මාර්ග සඳහන් කරයි.
 
අග්‍රාමාත්‍ය රනිල් වික්‍රමසිංහ මහතා සහ කතානායක කරු ජයසූරිය මහතා අතර ඊයේ පස්වරුවේ පැවති සාකච්ඡාවේදීත් විකල්පයක් ලෙස භාරකාර රජයක් සඳහා පසුබිම සැකසීමේ එකඟත්වයකට එළඹී ඇත.
 
මේ අතර නව භාරකාර රජයේ අගමැතිවරයා ලෙස හිටපු ජනාධිපති මහින්ද රාජපක්ෂ මහතා පත්කිරීමට නියමිතය.
 
භාරකාර රජය සඳහා ඇමැතිවරුන් 15දෙනෙකුගෙන් සමන්විත කැබිනට් මණ්ඩලයක්ද පත්කිරීමට නියමිත අතර, කැබිනට් මණ්ඩලයට මෙසේ පත් කෙරෙන්නේ ඒකාබද්ධ විපක්ෂයට සම්බන්ධ දේශපාලනය පක්ෂවල නායකයන් බවද දැනගන්නට තිබේ.