(මනෝජ් හර්ෂික)

එංගලන්තයේ වෙලින්ටන් දී පැවැත්වෙන ගෝලීය සමාජ නායක සමුළුව සදහා ශ්‍රී ලංකාව නියෝජනය කරමින් සිසු සිසුවියන් 11 දෙනෙකු සහභාගි වීමට සුදුසුකම් ලබා ඇත.

ඒ අනුව කුරුණෑගල ලයිසියම් ජාත්‍යන්තර පාසලේ මෙත්ලිනි පෙරියප්පෙරුම, අරින්දි ජයසිංහ , නෙහාරා රණසිංහ , සෙනුකා සෝමරත්න , යන සිසුවියන් සහ අනුරාධපුර ලයිසියම් පාසලේ ඉදුමිණ අවිනාශ් , ස්නේහා වික්‍රමසිංහ , රිසින්දි හේරත්, ආද්‍යා මනිමාරන්, ඇඩම් කේෂර , ජීත්වර ජයතිලක සහ තෙවන්මා විජයසිරි යන ශිෂ්‍ය කණ්ඩායම මෙම සමුළුව නියෝජනය කිරීමට සුදුසුකම් ලබා තිබේ.

වඩාත් යහපත් ලෝකයක් ප්‍රතිනිර්මාණය කිරීම වෙනුවෙන් සමාජ වෙනසක් කිරීමට බලාපොරොත්තු වන ලෝක තරුණ ප්‍රජාවගේ සහභාගිත්වයෙන් අගෝස්තු 4 සිට 16 වෙනිදා දක්වා මෙම සමුළුව පැවැත්වීමට කටයුතු යොදා ඇත. 

සංවර්ධනයේ ඉලක්ක කරා ගමන් කරන බහු ආගමික හා බහු වාර්ගික රටක අනාගතය භාර ගන්නා පුරවැසියන් ලෙස තම මව්බිමට වගකීම ඉටුකිරීමේ ක්‍රියාපිළිවෙත කෙසේ විය යුතු පිළිබඳව ශ්‍රී ලංකාව නියෝජනය කරන කණ්ඩායම මෙම සමුළුවේදි සාකච්ඡා කිරීමට නියමිතය.එයට අමතරව ගෝලීය සමාජය තුළ තරුණ ක්‍රියාකාරිකයින් තම සමාජ වගකීම පිළිබඳ ලබා ඇති අත්දැකීම් තුළින් ශ්‍රී ලාංකේය සමාජයට උකහාගත හැකි ප්‍රතිලාභ පිළිබඳව අධ්‍යනය කිරීමට ද මෙම සමුළුව තුළින් අවස්ථාව සැලසේ.

එසේම පාස්කු ප්‍රහාරයෙන් බිද වැටුණු සංචාරක කර්මාන්තය යළි නගාසිටුවීම ශ්‍රී ලංකාව දෙස ලෝක තරුණ ප්‍රජාවගේ අවධානය යොමු කර ගැනීම සදහා දේශීය සංස්කෘතික විශේෂාංග හා ශ්‍රී ලාංකේය ජන සම්ප්‍රදායන් පිළිබඳ විශේෂ වැඩසටහන් හුවමාරු කර ගැනීමට ද මෙරට නියෝජිත කණ්ඩායමට මෙමඟින් හැකිවේ.

මෙම ලෝක සමුළුවට සහභාගි වන ශ්‍රී ලාංකේය සිසු සිසුවියන් කුරුණෑගල ලයිසියම් ජාත්‍යන්තර පාසල සහ  අනුරාධපුර  ලයිසියම් ජාත්‍යන්තර පාසල නියෝජනය කරන අතර මෙම සමුළුව සදහා සහභාගි වන පළමු කණ්ඩායම බවට ද ඔවුන් පත්ව තිබේ.