සිතුම් චතුරංග

යාපනය දිස්ත්‍රික්කය තුල වෙල්ලමුල්ලිවයික්කාල් හි මියගිය පිරිස් සැමරීම සඳහා ජනතාව එක්රැස් නොකරන ලෙස නියෝග කරමින් යාපනයේ දෙමළ ප්‍රධාන පක්ෂ කිහිපයක දේශපාලඥයින් වෙත යාපනය මහෙස්ත්‍රාත් ඒ. පීටර් පොල්ඩ් මහතා තහනම් නියෝගයක් නිකුත් කළේය.

රටේ උද්ගතව පවතින සෞඛ්‍ය අවදානම් තත්වය හේතුවන් ජනතාව රැස් කිරමින් සිදුකිරීමට නියමිත වැඩසටහන් නොපවත්වන ලෙස දන්වමින් මහෙස්ත්‍රාත්වරයා මෙම නියෝගය නිකුත්කොට තිබේ.

පවතින කොවිඩ් 19 වයිරස ව්‍යාප්තිය හමුවේ වෙල්ලමුල්ලිවයික්කාල් සැමරුම වෙනුවෙන් අද(18) දිනයේ පැවැත්වීමට නියමිත වැඩසටහන් සඳහා ජනතාව රැස් කිරීමට දේශපාලන පක්ෂ නියෝජිතයින් පිරිසක් සුදානම්න් සිටින බවට යාපනය පොලිසිය විසින් යාපනය මහේස්ත්‍රාත් අධිකරණයට කරුණු වාර්තා කිරීමෙන් අනතුරුව මෙම තහනම් නියෝගය නිකුත්කර තිබිණ.

අදාළ කරුණු දැක්වීම හමුවේ යාපනය මහේස්ත්‍රාත් ඒ.පිටර් පෝල් මහතාගේ අත්සනින් යුතුව පවතින සෞඛ්‍ය අවදානම් තත්වය හමුවේ ජනතාව ඒකරාශි කිරීම වළක්වමින් නියෝගයක් නිකුත් කර ඇති බව යාපනය පොලිසිය පැවසීය.

පොලිසිය පැවසූයේ සමස්ත ලංකා දෙමළ කොංග්‍රස් පක්ෂයේ නායක ගජෙන්ද්‍රකුමාර් පොන්නම්බලම් මහතා ඇතුළු එම පක්ෂයේ නියෝජිතයින් 11 දෙනෙකු හට හා දෙමළ ජාතික සන්ධාන හිටපු පාර්ලිමේන්තු මන්ත්‍රීවරුන් වන ඊ.සරවනබවන් , මාවෙයි සේනාධිරාජා යන මහත්වරුන් ඇතුළු එම පක්ෂයේ ක්‍රියාකාරීන් පිරිසකට මෙම තහනම් නියෝග නිකුත් කර ඇති බවයි.

යුද්ධයෙන් මියගිය දෙමළ ජනතාව සිහි කිරීමේ වෙල්ලමුල්ලිවයික්කාල් සැමරුම් වැඩසටහන් දෙමළ දේශපාලඥයින්ගේ ප්‍රධානත්වයෙන් අද යාපනය දිස්ත්‍රික්කයේ ස්ථාන කිහිපයක පැවැත්වීමට කටයුතු සූදානම්කර තිබිණ.

තහනම් නියෝගයත් සමඟ සිය නිවෙස්තුළ අද(18) දිනයේ පහන් දල්වා යුද්ධයෙන් මියගිය සිය ඥාතීන් සැමරීම සිදුකරන ලෙසට උතුරේ දේශපාලඥයින් ඉල්ලීම් කොට ඇති බව යාපනය ජනතාව පැවසීය.