(අප්සරා යෝසිත් විජේසූරිය)

රත්නපුර මුද්දූව ප්‍රදේශයේ පදිංචි කොරෝනා වයිරසය ආසාදිත කොළඹ අයිඩීඑච් රෝහලේ ප්‍රතිකාර ලබන මැණික් ව්‍යාපාරිකයාගේ බිරිඳට සහ දියණියටත් කොරෝනා වයිරසය ආසාදිත වී ඇති බව වෛද්‍ය පරීක්‍ෂණ වාර්තා අනුව තහවුරුව ඇතැයි සබරගමු පළාත් සෞඛ්‍ය සේවා අධ්‍යක්‍ෂ වෛද්‍ය කේ.බී.කන්නන්ගර මහතා පවසයි.

මීට පෙර අවසථාවේ දී කොරෝනා වයිරසය ආසාදිත මැණික් ව්‍යාපාරිකයා ද ඇතුළුව මේවනවිට රත්නපුරයෙන් වාර්තා වූ කොරෝනා වයිරසය ආසාදිත සමස්ත රෝගී සංඛ්‍යාව තුන දක්වා ඉහළ ගොස් ඇති බව සෞඛ්‍ය අංශ වාර්තා අනුව තහවුරු කරයි.

එම මැණික් ව්‍යාපාරිකයාගේ බිරිඳ සහ දියණිය රත්නපුර ශීක්‍ෂණ රෝහලේ කොරෝනා වයිරස ආසාදිත යැයි සැක සහිත රෝගීන් රඳවන ප්‍රතිකාර ඒකකයේ නේවාසිකව සිටි බවත්, මෙම රෝගය වැළඳී ඇතිබව පරීක්‍ෂණ අනුව තහවුරු වූ පසුව, ඔවුන් දෙදෙනා ද කොළඹ අයිඩීඑච් රෝහල වෙත යොමු කිරීමට කටයුතු කර ඇති බවත් රෝහල් ආරංචි මාර්ග පවසයි.

මෙසේ කොරෝනා වයිරසය ආසාදිත මව සහ දියණිය  වයස අවරුදු 40ක පමණ කාන්තාවක් සහ  වයස අවුරුදු 20 ඉක්මවූ තරුණියක් බව සෞඛ්‍ය අංශ සඳහන් කරයි.