බ්‍රසීල ජනාධිපති ජාර් බොල්සොරානෝ මහතාටත් කොරෝනා වයිරසය වැළඳී ඇත්ද යන්න පිළිබඳව ඇමෙරිකානු ජනාධිපති ඩොනල්ඩ් ට්‍රම්ප් මහතාට අද (සිකුරාදා) දැනගැනීමට ලැබෙනු ඇත. බ්‍රසීල ජනාධිපතිවරයා සමග රාත්‍රී භෝජන සංග්‍රහයකට සහභාගි වූ ඇමෙරිකානු ජනාධිපති ඩොනල්ඩ් ට්‍රම්ප් මහතා එහිදී බ්‍රසීල ජනාධිපතිවරයාට අතට අත දී සුබ පැතුම් පිරිනමා තිබේ.

බ්‍රසීල ජනාධිපති ජාර් බොල්සරනෝ මහතාගේ මාධ්‍ය ලේකම්වරයාට කොරෝනා වයිරසය ආසාදනය වී ඇතැයි මේ වන විටත් තහවුරු වී තිබේ.

බ්‍රසීලයේ ජනාධිපතිගේ මාධ්‍ය ලේකම් ෆැබියෝ වජ්න්ගාර්න් මහතා පසුගිය සතියේ ඇමෙරිකාවට පැමිණි අතර,  ෆ්ලොරිඩාවේ පිහිටි ට්‍රම්ප් මහතාගේ නිවාඩු නිකේතනයේදී ඔවුහු හමු වූහ.

ඔවුන් දෙදෙනාට අමතරව ඇමෙරිකානු රාජ්‍ය නිලධාරීන්  සහ ඥාතීන් ද එහි පැවති උපන්දින සාදයකට සහභාගී වී ඇත. නැවත බ්‍රසීලයට ගිය ෆැබියෝ මහතා අසනීප වීම හේතුවෙන් වෛද්‍ය පරීක්ෂණයට යොමුවූ බවත්, එම අවස්ථාවේදී කොරෝනා වයිරසය ආසාදනය වී ඇති බව තහවුරු වූ බවත් වාර්තා වේ.

මේ හේතුවෙන් බ්‍රසීල ජනාධිපති ජාර් බොල්සරානෝ මහතාට ද වයිරසය ආසාදනය වී ඇත්දැයි සොයාබැලීම සඳහා වෛද්‍ය පරීක්ෂණ පවත්වන බවත්, එහි ප්‍රතිඵල අද නිකුත් වීමට නියමිත බවත් බලධාරීහු කියති.

ඇමෙරිකානු උප ජනාධිපති මයික් පෙන්ස් සහ බ්‍රසීල ජනාධිපතිවරයාගේ මාධ්‍ය ලේකම් ෆැබියෝ මහතා සමඟ ඇමෙරිකානු ජනාධිපතිවරයා සිටි ඡායාරූපයක්ද මාධ්‍යයට නිකුත් කර තිබිණි.

වෛරසය  ආසාදනය වීම සම්බන්ධයෙන් තමන් කලබල නොවන බව ජනපති ට්‍රම්ප් මහතා පවසා ඇත.

(ඩේලි මේල්)