පසුගිය පැය 24 තුළ ඉන්දියාවේ කොවිඩ් - 19 රෝගින් 3 900ක් වාර්තා වි ඇති බව එරට සෞඛ්‍ය අමාත්‍යාංශය පවසයි.

ඒ අනුව ඉන්දියාවෙන් වාර්තා වන මුළු ආසාදිතයින් සංඛ්‍යාව 46 433ක් දක්වා ඉහල ගොස් තිබේ.

මේ පිළිබඳ අදහස් දක්වමින් ඉන්දීය සෞඛ්‍ය අමාත්‍යාංශය පවසන්නේ සඳුදා දිනයේ කොරෝනා පරීක්සණ 80 000කට වඩා සිදුකර ඇති හෙයින් ආසාදිතයින් වැඩි පිරිසක් හඳුනා ගැනීමට හැකිවූ බවයි.

ලෝකයේ අඩුම දෛනික පරීක්ෂණ අනුපාතිකයක් පවතින ඉන්දියාව සිය පරීක්ෂණ ධාරිතාවය ඉහල නැංවීමට උත්සාහ දැරීම කොරෝනා ව්‍යාප්තිය මර්දනයේ සාර්ථක පියවරක් බව වෛච්‍ය විශේෂඥයෝ පවසති.

ඉන්දීය සෞඛ්‍ය බලධාරීන් පවසන්නේ දිනකට සාම්පල 100 000ක් පමණ පරීක්ෂා කිරීමට බලාපොරොත්තු වන බවයි. 

ඉන්දියාව මේ වනවිට වයිරස ව්‍යාප්තිය අඩු කළාප වල අගුලු දැමීම් ලිහිල් කිරීම සිදුකරගෙන යයි. 

කෙසේ වුවද විශේෂඥයන් අනතුරු අඟවා ඇත්තේ සීමාවන් ඉක්මනින් ලිහිල් කිරීම හේතුවෙන් අවාසිදායක තත්ත්වයක් උදාවියහැකි බවයි.

ඉදිරි සති හතරේ සිට හය දක්වා කාලය ඉතා වැදගත් බවත් ආසාදන අනුපාතය ඉහල යාමට ඉඩ ඇති බැවින් පොලිසියට විශාල වගකීමක් පැවරෙන බවත් ඔවුහු සඳහන් කරති.

ඉන්දියාවේ මේ වනවිට කොරෝනා ආසාදිත මරණ 1 571ක් සිදුවී තිබේ.


(බීබීසී ඇසුරිණි - 085)