ශාන්ත ප්‍රදීප් කුමාර කුලරත්න

ඇඳිරි නීතිය පවතින අවස්ථාවේදී අලෙවි කරමින් තිබූ පරිභෝජනයට නුසුදුසු අර්තාපල් කිලෝ දහසක් විනාශ කර එම තොග අලෙවි මධ්‍යස්ථානයකට එරෙහිව නඩු පැවරීමට (08) දා පියවර ගත් බව ,මහරගම සෞඛ්‍යය වෛද්‍ය නිලධාරි කාර්යාලය පවසයි.

ඇදිරි නීතිය පවතින අවස්ථාවේ දී තලවතුගොඩ නගර මධ්‍යයේ  පිහිටි අලෙවි සල් කිහිපයක් ඉතා සූක්ෂම ලෙස වෙළඳසැල් වල  පිටුපස දොරින් භාණ්ඩ විකුණන බවට මහරගම සෞඛ්‍ය වෛද්‍ය නිලධාරී කාර්යාලයට ලද තොරතුරක් අනුව  මහජන සෞඛ්‍ය පරික්ෂක නිලධාරින් සිදුකළ හදිසි  වැටලීමකදී මෙම අර්තාපල් තොගය සොයා ගැනීමට හැකි වූ බව  කියයි .

සෞඛ්‍යය ආරක්ෂිත බවින් තොර හා මනුෂ්‍ය පරිභෝජනයට නුසුදුසු  තත්ත්වයේ තිබූ   මෙම අර්තාපල් තොගය  එම ස්ථානයේදීම  විනාශ කර දැමීමට මහජන සෞඛ්‍ය පරීක්ෂක නිලධාරීන් පියවර ගත් බව පැවසේ .

මෙසේ විනාශ කර දැමූ අර්තාපල්  තොගයේ වටිනාකම රුපියල් ලක්ෂ දෙකකට ආසන්න බව ද පැවසේ.

තවදුරටත් විමර්ශන සිදු කිරීමේදී මෙම අලෙවිසැල් හිමිකරු  ජංගම රථ හරහා භාණ්ඩ අලෙවි කිරීමට ඇඳිරිනීති බල පත්‍ර හතරක් ලබාගෙන  තිබූ පුද්ගලයකු බවට ද තොරතුරු  අනාවරණය වූ බව පැවසේ.

මීට අමතරව  තලවතුගොඩ නගර මධ්‍යයේ හොර රහසේ භාණ්ඩ අලෙවි කළ තවත් වෙළඳසැල් තුනක් වටලා එහි හිමිකරුවන්ට තරයේ අවවාද කිරීමට ද පියවර ගත් බව පැවසේ.