( තිළිණි ද සිල්වා )

කුවේටයේ නීති විරෝධීව රැදී සිටින  ලාංකික ශ්‍රමිකයින්ට ලබාදී ඇති පොදු සමාකාලය තුළ එරටින් පිටවිම සඳහා තිබු කාලය මැයි මස 30 දක්වා දීර්ඝ කරන ලෙසට විදේශ සබඳතා අමාත්‍ය දිනේෂ් ගුණවර්ධන මහතා කුවේට් රජයෙන්  ඉල්ලීමක් කර ඇත. 

ඒ විදේශ සබඳතා, නිපුණතා සංවර්ධන, රැකීරක්ෂා හා කම්කරු අමාත්‍ය දිනේෂ් ගුණවර්ධන මහතා  ශ්‍රී ලංකාවේ කුවේට් තානාපති කළාෆ් දහයිර් මහතා හමු වී මෙම ඉල්ලීම කර ඇතැයි විදේශ සබදතා අමාත්‍යාංශය සදහන් කර සිටී.

අමාත්‍යවරයා මෙම ඉල්ලීම කළේ කුවේට් තානාපතිවරයා සමඟ සිය අමාත්‍යාංශයේ පැවති සාකච්ඡවකදීය. 

නිතීවිරෝධී ලෙස කුවේටයේ රැදී සිටින විදේශිකයින් සදහා ලබා දී තිබූ  සමාකාලය තුළ එරටින් පිටවිම සඳහා තිබු කාලය අද (25) අවසන් විය. 

මෙම ඉල්ලීම සම්බන්ධයෙන්  ඉතාම ඉක්මණින් සාධනීය පිළිතුරක් ලබා දෙන බව ද මෙරට කුවේට්  තානාපතිවරයා  එහිදි අමාත්‍ය දිනේෂ් ගුණවර්ධන මහතාට පවසා ඇත 

මේ අතර කුවේටයේ නීති විරෝධීව රැදී සිටින  ලාංකික ශ්‍රමිකයින්ට ආහාර හා නවාතැන් පහසුකම් ලබාදීමටද එරට රජය පියවර ගෙන තිබේ. 

කුවේට් රජයේ උපදෙස් පරිදි එරට ශ්‍රී ලංකා තානාපති කාර්යාලය විසින් නීතිවිරෝධීව රැදි සිටින ශ‍්‍රමිකයන් ලියාපදිංචි කිරිම ආරම්භකර තිබේ.

විදේශ සේවා නියුක්ති කාර්යාංශය විසින් මෙම ශ‍්‍රමිකයන් සම්බන්ධව තොරතුරු සම්බන්ධිකරණය කුවේටයේ ශ‍්‍රී ලංකා තානාපති කාර්යාලයේ  කම්කරු සුබසාධන අංශය හරහා සිදුකරමින් සිටින බවද විදේශ සබදතා අමාත්‍යාංශය කියා සිටී. 

මෙම සාකච්ඡාව සඳහා විදේශ සබදතා අමාත්‍යාංශයේ ලේකම් රවිනාථ ආර්යසිංහ, විදේශ සේවා නියුක්ති කාර්යාංශයේ සභාපති කමල් රත්වත්තේ යන මහත්වරුන් එක්වී සිටියහ.