රවින්ද්‍ර ප්‍රභාත් නෙත්තසිංහ 

වාරියපොල දී නාවික සෙබලෙකුගේ පියාට සහ සොහොයුරෙකුට පහරදුන් බව කියන පුද්ගලයින් සිව් දෙනෙකු හෙට (06) දිනයේ හදුනාගැනීමේ පෙරට්ටුවකට ඉදිරිපත් කරන ලෙස වාරියපොල දිසා විනිසුරු සහ මහේස්ත්‍රාත් දර්ශණ ද සිල්වා මහතා අද (05) නියෝග කළේය.

සිද්ධිය සම්බන්ධයෙන් අද දිනයේදී නීතීඥයෙකු මාර්ගයෙන් වාරියපොල පොලිසියට බාරවූ පුද්ගලයින් සිව් දෙනෙකු හෙට දිනය දක්වා රක්ෂිත බන්ධනාගාරගත කරන ලෙසද මහේස්ත්‍රාත්වරයා නියම කළේය. ඊයේ (04) දිනයේදී ද මෙම සිද්ධිය සම්බන්ධයෙන් එක් පුද්ගලයෙකු රක්ෂිත බාරයට පත් කර තිබිණ.


මෙසේ රක්ෂිත බාරයට පත් කෙරුණේ වාරියපොල අමර උදාගම පදිංචි සුසන්ත රාජපක්ෂ , ටී.එම් . ආනන්ද , එච්.එම්. සමන්ත කුමාර , ආර්.එම්. රෝහණ ජයතිස්ස සහ ඩබ්.එච්. රොෂාන් ඉන්දික කුමාර  නැමැති පිරිසකි.


යාපනය ප්‍රදේශයේ නාවික කදවුරක සේවය කරන නාවික සෙබලෙකුගේ පියා සහ සොයුරෙකු එම නාවික සෙබලාගේ බිරිද සහ වසරක් වයසැති බිළිදා වෙසෙන වාරියපොල නෑටිය ප්‍රදේශයේ නිවසට ගිය අවස්ථාවේ දී මෙසේ පහරදීමට ලක්වූ බවට පොලිසියට පැමිණිලි ලැබී තිබිණ.


රක්ෂිත බාරයට පත්වූ පිරිස අතර වැඩ තහනමට ලක්වූ පොලිස් නිලධාරියෙකුද සිටින බව වාරියපොල පොලිසිය කියයි.