රටම වසා දැමීමේ ‘ලොක්ඩවුන්’ සීමා නොතකමින් මුහුදු වෙරළට ගිය සෞඛ්‍ය අමාත්‍යවරයා තනතුරෙන් පහත හෙළන බව නවසීලන්ත අග්‍රාමාත්‍ය ජසින්ඩා ආඩ්න් අද (7) ප්‍රකාශ කළාය.

නවසීලන්තය ‘ලොක්ඩවුන්’ හෙවත් රටම වසා දැමීමේ සීමා පැනවූ මුල් දින කිහිපයේදී එරට සෞඛ්‍ය අමාත්‍ය ඩේවිඩ් ක්ලාක් එම නීති නොතකමින් සිය පවුලේ සාමාජිකයන් ද සමඟ මුහුදු වෙරළට ගොස් ඇත.

සෞඛ්‍ය අමාත්‍යවරයා කැබිනට් මණ්ඩලයේ පසුපෙළ දක්වා තනතුරින් පහත හෙළන බව කී නවසීලන්ත අග්‍රාමාත්‍යවරිය ඔහු සමාජ දුරස්ථභාවයට අදාළ නීති කඩ කර ඇතැයි ද කීවාය.

‘‘මේක සාමාන්‍ය තත්ත්වයක් නෙමෙයි, වෙන වෙලාවක නම් මං ඔහු සෞඛ්‍ය අමාත්‍ය ධුරයෙන් අස් කරනවා. ඔහු වැරැද්දක් කර තිබෙනවා. ඊට කිසිදු සමාවක් නැහැ’’ යැයි නවසීලන්ත අග්‍රාමාත්‍යවරිය වෙලින්ටන් නුවරදී ප්‍රකාශ කළාය.

‘‘මම ඔහුගේ ඉල්ලා අස්වීමේ ලිපිය බාරගන්නේ නැහැ. එහෙම කරන්න ගියොත් මේ වෙලාවේ කොරෝනා වයිරසයට එරෙහිව කරන සියල්ල අවුල් වෙනවා’’ යැයි අග්‍රාමාත්‍යවරිය කීවාය.


ධුරයෙන් ඉවත් කිරීම වෙනුවට ඔහු කැබිනට් මණ්ඩලයේ පසුපෙළට යවන බවත් ඔහු සහායක මුදල් අමාත්‍ය ධුරයෙන් ද ඉවත් කරන බවත් නවසීලන්ත අග්‍රාමාත්‍යවරිය කීවාය.

‘‘මම වෙනදට වඩා යමක් බලාපොරොත්තු වෙනවා. ඒ වගේම නවසීලන්තයත් වෙනදට වඩා වැඩි යමක් බලාපොරොත්තු වෙනවා’’ යැයි නවසීලන්ත අග්‍රාමාත්‍යවරිය පැවැසුවාය.

‘‘මම මහ මෝඩයෙක්. මං දන්නවා ඇයි මට මිනිස්සු බනින්නේ කියලා. මං දන්නවා ඇයි මිනිස්සු මාත් එක්ක මෙච්චර තරහා කියලා’’ යැයි ඩේවිඩ් ක්ලාක් නිවේදනයක් නිකුත් කරමින් සඳහන් කළේය.

රොයිටර්

055