(වසන්ත චන්ද්‍රපාල)

අම්පාර අක්කරපත්තුව 19 ග්‍රාම නිලධාරී වසමෙන් හමු වූ කොරෝනා ආසාදිතයාගේ පවුලේ සාමාජිකයින් අටදෙනා සහ කොරෝනා ආසාදිතයා කොළඹ සිට රැගෙන ආ වෑන් රථයේ රියදුරු සහ සහායක නිරෝධායනය සඳහා පොලොන්නරුව දම්මින්න නිරෝධායන මධ්‍යස්ථානය වෙත ඇතුළත් කර තිබේ.

මෙම කොරෝනා ආසාදිතයා කටාර් රාජ්‍යෙය් සංචාරයකින් පසුව පසුගිය මාර්තු 16 වෙනි දින අම්පාරට පැමිණ තිබේ.  පසුව පොලිසියට කරුණු වාර්තා කර මහජන සෞඛ්‍ය පරීක්ෂකවරුන් ගේ නිර්දේශය අනුව මාර්තු 30 වැනිදා දක්වා  නිවස තුල ස්වයං නිරෝධායනය වී තිබේ. නිරෝධායනය වී දින නවයකින් පසුව ඔහුගේ නියැදි පරීක්ෂා කිරීමේදී කොරෝනා ආසාදිත වී ඇති  බව තහවුරු කර ගැනීමෙන් පසු ඔහු වැලිකන්ද රෝහලට ඇතුළත් කර තිබේ.

මෙයට අමතරව මෙම ගම්මානයේ පුද්ගලයින් 320 දෙනෙකු නිවෙස් වලම නිරෝධායනය කරන අතර එම ප්‍රදේශයට ඇතුළු වන මාර්ග වසා දැමීමට සෞඛ්‍ය බලධාරින් පියවර ගෙන තිබේ.

පවතින තත්වය මත අක්කරපත්තුවට පැමිණෙන අම්පාර , කල්මුණේ ,පොතුවිල්  ප්‍රධාන මාර්ග වසා දමා ඇති අතර නගරයට ඇතුල්වීමට හෝ පිටවීමට කිසිවෙකුට අවසර නොදෙන අතර අත්‍යවශ්‍ය සේවා වලට පමණක් ඇතුල්විය හැකි බව අම්පාර කොට්ඨාස භාර පොලිස් අධිකාරි ජයන්ත රත්නායක මහතා පැවසීය.

මෙම ප්‍රදේශයේ ආරක්ෂාව සඳහා ශ්‍රී ලංකා යද හමුදාව, පොලිසිය , පොලිස් විශේෂ කාර්ය බලකාය , සිවිල් ආරක්ෂක බලකාය යොදවා තිබේ.