කොරෝනා වෛරසයේ පැතිරීම වර්ධනය වීම හේතුවෙන් ඕස්ට්‍රේලියාවේ සියලු අත්‍යවශ්‍ය නොවන සේවා මේ වන විට අත්හිටුවා තිබේ. 

එරට සියලු අවන්හල් හා ආගමික ස්ථාන ද වසා දමා ඇත.පනවන සීමා කිරීම් පිළිබඳ කැබිනට් රැස්වීමෙන් අනතුරුව එරට අග්‍රාමාත්‍ය ස්කොට් මොරිසන් මහතා නිවේදනය කළේය.

ඒ අනුව බොහෝ ව්‍යාපාර තාවකාලිකව වසා දැමෙන නමුත් සුපිරි වෙළෙඳසැල්, ඉන්ධන අලෙවිසැල්, ඖෂධ අලෙවි සැල් හා නිවෙස්වලට භාණ්ඩ බෙදාහරින සේවා අඛණ්ඩව ක්‍රියාත්මක කෙරේ.  

පාසල් විවෘතව තැබීම තම අවශ්‍යතාව බව අග්‍රාමාත්‍යවරයා පැවසූ නමුත් නිවෙස්වල දරුවන් තබා ගැනීමට දෙමව්පියන් අපේක්ෂා කරන්නේ නම් ඊට අවස්ථාව ඇතැයි ඔහු සඳහන් කළේය.

වික්ටොරියා ඇතුළු ප්‍රාන්ත කිහිපයක් පාසල් වසා දැමීමට අවශ්‍ය බව පෙන්වා දී ඇත.

කොරෝනා වෛරසය ආසාදනයෙන් මේ වන විට ඕස්ට්‍රේලියාවේ මරණ 7 ක් සිදුවී තිබේ.

මේ වන විට වෛරසය ආසාදනය වී සිටින මුළු රෝගීන් සංඛ්‍යාව 1315 කි.

වෛරසය හේතුවෙන් වැඩිම බලපෑම එල්ල වී ඇත්තේ නිව් සවුත් වේල්ස් ප්‍රාන්තයට වන අතර ඉන් රෝගීන් 533 දෙනෙකු වාර්තා වේ.

වික්ටෝරියා ප්‍රාන්තයෙන් මේ වන විට වාර්තා වී ඇති රෝගීන්  සංඛ්‍යාව 296 කි.

ඊට අමතරව ක්වීන්ස්ලන්ඩ් ප්‍රාන්තයෙන් රෝගීන් 259 දෙනෙකු වාර්තා වී තිබේ. 
 
-226-

(බීබීසී ඇසුරෙනි)