2021 ජුලි මස 30 වන සිකුරාදා
ඕස්ට්‍රේලියාවේ රැස්විය හැකි උපරිම ගණන 2යි
කොරෝනා වයිරසයේ ව්‍යාප්තිය පාලනය කිරීම සඳහා මහජන ඒකරාශීවීම් පුද්ගලයන් දෙදෙනකුට සීමා කිරීමට ඕස්ට්‍රේලියානු රජය තීරණය කර ඇත.
මීට පෙර ඕස්ට්‍රේලියාවේ මහජන ඒකරාශීවීම් දස දෙනකුට සීමා කිරීමට එරට රජය පියවර ගෙන තිබිණි.
ඊට අමතරව වාණිජ සහ නේවාසික කුලී නිවාසවලට මාස හයක සහන කාලයක් ලබාදීමට පියවර ගන්නා බවද ඔස්ට්‍රේලියානු අග්‍රාමාත්‍ය ස්කොට් මොරිසන් පැවැසීය.
කොරෝනා වයිරසය හේතුවෙන් ලොව අනෙක් රටවල මෙන්ම ඔස්ට්‍රේලියාවේ ආර්ථිකයට මෙන්ම සාමාන්‍ය ජන ජීවිතයට දැඩි බලපෑමක් එල්ල වී තිබේ.
මේ හේතුවෙන් එරට ආර්ථිකයට දැඩි පීඩනයක් එල්ල වී තිබෙන අතර තෙවැනි ආර්ථික සහන පැකේජය ඉදිරියේදී ක්‍රියාත්මක කරන බව ද ඔස්ට්‍රේලියානු අග්‍රාමාත්‍යවරයා කීය.
කඩසාප්පු වසා දැමීමට ද ඔස්ට්‍රේලියාව පියවර ගෙන ඇති අතර එසේ වුවත් ව්‍යාපාර පවත්වාගෙන යෑම සඳහා සේවකයන්ට වැටුප් ගෙවීම සඳහාත් ආර්ථික සහන පැකේජයට වැටුප් සුරක්ෂිතතා ක්‍රමවේදයක් හඳුන්වාදෙන බව ද ඔස්ට්‍රේලියානු රජය සඳහන් කළේය.
කුලී නිවාස යනාදියේ වාණිජ ගිවිසුම් සහ කොන්දේසි සාකච්ඡා කර සහනයක් ලබාදීමට පියවර ගන්නැයි ද නිවාස හිමියන්ට සහ ඒවායේ කුලී නිවැසියන්ට ඔස්ට්‍රේලියානු රජය උපදෙස් දී ඇත.
මේ අදාළ සියලු ක්‍රියාමාර්ගවලට අග්‍රාමාත්‍යවරයා කඩිනමින් අත්සන් තබනු ඇතැයි ද ඔස්ට්‍රේලියානු රජය සඳහන් කළේය.
ද ගාඩියන්
055
