නව කොරෝනා වයිරසයේ ව්‍යාප්තිය පාලනය කිරීම සඳහා රටපුරා පැනවූ ලොක්ඩවුන් සීමාවලින් පසු සංක්‍රමණික සේවකයන් ගෙන්වා ගැනීම සඳහා පළමු වරට දුම්රියක් ධාවනය කිරීමට ඉන්දීය බලධාරීහු අද  (01) පියවර ගත්හ.
 
රටටම බලපැවැත්වෙන පරිදි පැනවූ ලොක්ඩවුන් සීමා හේතුවෙන් ඉන්දියාවේ සංක්‍රමණික සේවකයන් මිලියන ගණනක් විවිධ ස්ථානවල කොටු වූ අතර තවත් දස දහස් ගණනක් සිය ගම්බිම් බලා ඇවිද ගියහ. රටම වසා දැමීමේ ලොක්ඩවුන් සීමා හේතුවෙන් ඉන්දියාවේ මිලියන ගණනක් පීඩාවලට පත්වූ අතර කුසගින්නේ මියයෑමේ අවදානමකට ද පත්වූහ.
 
1,200කට ආසන්න පිරිසක් මෙම පළමු දුම්රියට සිනා මුසු මුහුණින් ගොඩ වූ අතර දුම්රියට ගොඩවූ අවස්ථාවේදී ඔවුහු අත්පොළසන් දුන්හ. තෙලාන්ඟනා ප්‍රාන්තයේ ලිංඟම්පාලි වෙතින් මෙම දුම්රිය ගමන් ඇරැඹීමට නියමිතව තිබූ අතර එය ජාර්කාන්ද් ප්‍රාන්තයේ හටියා වෙත ගමන් කිරීමට නියමිතය. 
 
එය පැය 19ක දුම්රිය ගමනකි. තෙලන්ඟානා යනු ඉන්දියාවේ දකුණු දෙසට වන්නට පිහිටි ප්‍රාන්තයකි. ජාර්කාන්ද් යනු නැගෙනහිර පෙදෙසේ ප්‍රාන්තයකි.
 
ලොව විශාලම දුම්රිය පද්ධතිවලින් එකක් වන ඉන්දියාවේ දුම්රිය සේවාව කොරෝනා වයිරසය හේතුවෙන් නවතා දමා ඇත. මෙම දුම්රිය විශේෂිත දුම්රියක් බවත් දුම්රිය සේවා ආරම්භ කිරීම සම්බන්ධයෙන් තීරණය ඉදිරියේදී ගන්නා බවත් බලධාරීහු කීහ.
 
අල්ජසීරා
ඡායාරූපය – ඒ.පී.

(055)