ඇමෙරිකා එක්සත් ජනපද ආරක්ෂක අංශවල සාමාජිකයන් සහ ආරක්ෂක දෙපාර්තමේන්තුවේ සිවිල් වැසියන් ඇතුළු 7,000 කට වැඩි පිරිසකට කොරෝනා වයිරසය ආසාදනය වී ඇතැයි ‘ද නිව්යෝක් ටයිම්ස්’ පුවත්පත වාර්තා කරයි.

ඒ අනුව පසුගිය බදාදා (6) උදෑසන වනවිට වාර්තා වී තිබූ තොරතුරු අනුව ඇමෙරිකා එක්සත් ජනපද ආරක්ෂක අංශවල සාමාජික සාමාජිකාවන්, ඒවාට සම්බන්ධ කොන්ත්‍රාත්කරුවන් සහ ආරක්ෂක දෙපාර්තමේන්තුවේ සිවිල් වැසියන් ඇතුළු 7,000කට වැඩි පිරිසකට වයිරසය ආසාදනය වී ඇත.

ඇමෙරිකා එක්සත් ජනපදයේ ප්‍රාන්ත සියල්ලේම පිහිටා ඇති කඳවුරු 150කට ආසන්න සංඛ්‍යාවක ඉහත කී ආරක්ෂක අංශ සාමාජික සාමාජිකාවන් ඇතුළු පිරිස් සිටින බව ‘නිව්ස්වීක්’ සඟරාව වාර්තා කර ඇත.

එම පිරිස කොරෝනා වයිරසයෙන් පූර්ණ සුවය ලැබු පසු නැවත ආරක්ෂක අංශවලට සම්බන්ධ කරගන්නේ ද නැතිනම් ඔවුන් ඉවත් කරන්නේ ද යන්න තවමත් පැහැදිලි නැති බව ද එම සඟරාව පළ කළ පුවත් වාර්තාවේ දැක්වේ.

ඇමෙරිකා එක්සත් ජනපද ආරක්ෂක අංශවලට සම්බන්ධ වීමට කැමැති එහෙත් කොරෝනා වයිරසය ආසාදනය වී රෝහල් ගත පසුව පූර්ණ සුවය ලැබූ පිරිස් ආරක්ෂක අංශවලට සම්බන්ධ කරගැනීම තාවකාලිකව නවතා දැමීමට ද ඇමෙරිකානු බලධාරීහු පියවර ගෙන ඇත.

පෙන්ටගනය ඊට අදාළ නියෝගයක් ද නිකුත් කර ඇතැයි මේ සම්බන්ධයෙන් තොරතුරු දන්නා නිලධාරීහු ‘ද නිව්යෝක් ටයිම්ස්’ පුවත්පත පවසා ඇත.

‘‘මේක තාවකාලික නියෝගයක්. මාර්ගෝපදේශයක්. හමුදා නිලධාරීන් තවමත් වයිරසය අධ්‍යයනය කරමින් ඉන්නවා. කොරෝනා වයිරසයේ දීර්ඝකාලීන බලපෑම් තිබෙනවාද , වයිරසය ආසාදනය වූ අයකුට හමුදාවට සම්බන්ධ විය හැකි ද යනාදිය ගැන තවමත් අධ්‍යයනය කරනවා’’ යැයි ආරක්ෂක දෙපාර්තමේන්තුවේ නිලධාරීහු කීහ.

රටේ අනෙක් පිරිස් හා කණ්ඩායම් මෙන්ම ක්‍රියාන්විතයේ මෙන්ම රාජකාරීවල සිටින ඇමෙරිකානු ආරක්ෂක අංශවල දොළොස් ලක්ෂයකට ආසන්න පිරිස කොරෝනා වයිරසයෙන්ම මෙන්ම එහි බලපෑමෙන් බේරාගැනීමට එක්සත් ජනපද ආරක්ෂක දෙපාර්තමේන්තුව දැඩි අරගලයක නිරත වී සිටී.

හමුදාවට අලුතෙන් බඳවාගත් ඉන්පසුව කොරෝනා වයිරසය ආසාදනය වූ අයටද ආරක්ෂක අංශවලට සම්බන්ධ වීම තාවකාලිකව නවතා දමා තිබෙන අතර නැවත පැමිණිය යුතු දින පසුව දැනුම් දෙන බව ද ආරක්ෂක දෙපාර්තමේන්තුවේ නිලධාරීහු කීහ. 

ඡායාරූපය - රොයිටර්ස්

055