(ඩිල්ෂානි චතුරිකා දාබරේ)
 
බෝ නොවන රෝග ඇතුළු දෛනික සෞඛ්‍ය සේවා සඳහා අවශ්‍ය ඖෂධ රැසක් ඉන්දියාවේ සිට හෙට (07) ආනයනය කරන බව රජය පවසයි.
 
රජයේ ඉල්ලීම මත එම ඖෂධ ගෙන ඒමට කටයුතු යොදා ඇතැයි පැවසේ.
 
කොරෝනා වයිරසය පැතිරයාම සමග රටේ උද්ගතව ඇති තත්ත්වය පිළිබඳව සාකච්ඡා කිරීම සඳහා රජය සහ සමගි ජන බලවේගය අතර අද (06) ජනාධිපති කාර්යාලයේ දී පැවැති සාකච්ඡාවකදී මෙම තීරණය ගෙන තිබේ.
 
සෞඛ්‍ය සහ තවත් ක්ෂේත්‍ර රැසක ඉදිරි පියවර පිළිබඳව ද රජයේ සහ සමගි ජන බලවේගයේ අවධානය මෙහිදී යොමුවිය.
 
ජනාධිපති ගෝඨාභය රාජපක්ෂ සහ අග්‍රාමාත්‍ය මහින්ද රාජපක්ෂ යන මහත්වරුන්ගේ  ප්‍රධානත්වයෙන් පැවති මෙම සාකච්ඡාවට රජය නියෝජනය කරමින් දිනේෂ් ගුණවර්ධන, නිමල් සිරිපාල ද සිල්වා, විමල් වීරවංශ, ඩලස් අලහප්පෙරුම, බන්දුල ගුණවර්ධන, ජොන්ස්ටන් ප්‍රනාන්දු යන අමාත්‍යවරු  ද, සමගි ජන බලවේගය නියෝජනය කරමින් එහි නායක සජිත් ප්‍රේමදාස සහ මහලේකම් රංජිත් මද්දුමබණ්ඩාර හා ජනාධිපති ලේකම් ආචාර්ය පී.බී. ජයසුන්දර යන මහත්වරු ද එක්ව සිටියහ.