කෝවිඩ්-19 ට එරෙහි ක්‍රියාන්විතයට අදාළ ශ්‍රී ලංකා නිල අන්තර්ජාල අඩවිය නිකුත් කළ නවතම වාර්තාව අනුව, කොරෝනා වයිරසය ආසාදනය වීම හේතුවෙන් රෝහල්වල ප්‍රතිකාර ලබමින් සිටි 17දෙනෙකු සුවය ලබා අද(18) පිටව ගොස් ඇත.

ඒ අනුව, සුවය ලැබූ සමස්ත ආසාදිතයන් ගණන 3060ක් වන නමුත්, ආසාදිතයෝ 220ක් තවදුරටත් රෝහල්ගතව ප්‍රතිකාර ලබමින් සිටිති.

සැප්තැම්බර් 1 වැනි දිනයේදී, රෝහල්ගතව ප්‍රතිකාර ලබමින් සිටින ගණන 201ක් වූ අතර, එදින සිට ප්‍රතිකාර ලබන ගණන ක්‍රමිකව පහළ බැස තිබිණි. 10 වැනිදා වන විට එම අගය 185ක් විය.  එසේවුවත්, සැප්තැම්බර් 11 සහ 12 යන දෙදින තුළ  ආසාදිතයන් 28දෙනෙකු හඳුනාගැනීමත් සමඟ රෝහල්වල ප්‍රතිකාර ලබන ගණන  ඉහළ ගියේය.  ඒ අනුව, 12 වැනිදා වනවිට එම ගණන 200ක් විය. අද(18) දිනයේ දී එම අගය 220කි.

අද දිනයේ දී සුවය ලබා පිටව ගිය පිරිස අතර, ජාතික බෝවන රෝග විද්‍යායතනයෙන් තිදෙනෙක් ද, වැලිකන්ද මූලික රෝහලෙන් 11දෙනෙක් ද, ඉරණවිල රෝහලෙන් තිදෙනෙක් ද වෙති.

ඊයේ(17) දිනයේ දී ද සුවය ලැබූ ආසාදිතයෝ 22දෙනෙක් පිටව ගියහ. ඊයේ විදෙස්ගතව සිට පැමිණි තිදෙනෙකු ආසාදිතයන් බව හඳුනාගැනිණි.

අද උදෑසන 10.00 වනවිට රෝහල් ගතකර ඇති, කොරෝනා රෝගීන් ලෙස සැකසහිත රෝගීන් ගණන 28ක් බවද එම නිවේදනයේ දැක්වේ.

මේ වනවිට ශ්‍රී ලංකාවේ කොරෝනා වයිරසය ආසාදනය වූ  සමස්ත ආසාදිතයන් සංඛ්‍යාව 3276ක් වන අතර, 13දෙනෙකු මිය ගොසිනි.