(රොමේෂ් මධුෂංඛ)

මන්නාරම එරුක්කලම්පිඩ්ඩි ප්‍රදේශයේ එකම පවුලේ 5දෙනෙකුට කොවිඩ්-19 වයිරසය ආසාදනය වීම හේතුවෙන් ගම්මානයට සංචරණ සීමා පනවා ඇති බවට මන්නාරම ජ්‍යෙෂ්ඨ පොලිස් අධිකාරී පණ්ඩුල වීරසිංහ මහතා පවසා සිටියේය.
 
එරුක්කලම්පිඩ්ඩි ප්‍රදේශයේ පදිංචි වයිරසය ආසාදිත පුද්ගලයින් ඇසුරු කරන ලද පුද්ගලයින් 172 දෙනෙකු නිරෝධායනය කර ඇති අතරම පුද්ගලයින් 300 කට ආසන්න පිරිසක් ක්ෂණික ප්‍රතිදේහ පරීක්ෂාවට සහ පී.සී.ආර්. පරික්ෂණයන්ට යොමු කොට ඇති බවටද ජ්‍යේෂඨ පොලිස් අධිකාරීවරයා පවසා සිටීය.
 
පුත්තලමේ සිට පැමිණි අයෙකුට පළමුව කොරෝනා වයිරසය ආසාදනය වී ඇති අතර පසුව ඔහුගේ පවුලේ සිටි සෙසු 4 දෙනාටද වයිරසය ආසාදනය වී ඇත.
 
කෙසේ වෙතත් එරුක්කලම්පිඩ්ඩි ප්‍රදේශයේ කොරෝනා ආසාදිතයින් ඇසුරු කරන ලද පුද්ගලයින්ගේ පී.සී.ආර්. පරීක්ෂණ තහවුරු වන තුරු පමණක් සංචරණ සීමා පැනවීමට අවශ්‍ය බවට පොලීසියට දැනුම් දුන් බවටත් පළමු කොරෝනා ආසාදිතයා විවාහ මංගල්ලයකට සහභාගී වී ඇති බවට දැනට තොරතුරු ලැබී ඇති බවටද මන්නාරම් දිස්ත්‍රීක් ප්‍රාදේශීය සෞඛ්‍ය සේවා අධ්‍යක්ෂක වෛද්‍ය ආර්. විනෝදන් මහතා පවසා සිටියේය.
 
මේ වන විට මන්නාරම එරුක්කලම්පිඩ්ඩි ප්‍රදේශයට පොලීසිය හා යුදහමුදාවෙන් ආරක්ෂාව සපයා සංචාරණ සීමා පනවා ඇති අතරම ගම්වැසියන් නිවාසවලට වී නිරෝධායනය කරවීමට පියවර ගෙන ඇති බවටද මන්නාරම සෞඛ්‍ය සේවා කාර්යාලය වැඩිදුරටත් පැවසීය.