ඇමෙරිකා එක්සත් ජනපදයෙන් අඟහරුවාදා (7) දිනයෙන් අවසන් වූ පැය 24 ක කාලයේදී නව කොරෝනා වයිරස ආසාදිතයන් 60,209කු වාර්තා වී ඇත.

එරට ජෝන්ස් හොප්කින්ස් විශ්ව විද්‍යාලයට අනුව එම පැය 24ක කාලයේදී වයිරස ආසාදිතයන් 60,209 දෙනකු සහ වයිරස ආසාදිත මරණ 1,114ක් වාර්තා වී ඇත.

මේ වනවිට ලොව වැඩිම නව කොරෝනා වයිරස ආසාදිතයන් ගණනක් සහ වයිරස ආසාදිත මරණ සංඛ්‍යාවක් වාර්තා වන්නේ ද ඇමෙරිකා එක්සත් ජනපදයෙනි.

ජෝන්ස් හොප්කින්ස් විශ්ව විද්‍යාලයේ දත්තවලට අනුව ඇමෙරිකා එක්සත් ජනපදයෙන් මේ වනවිට වාර්තා වන නව කොරෝනා වයිරස ආසාදිතයන්ගේ සමස්ත ගණන 3,016,515කි. එරටින් වාර්තා වන සමස්ත වයිරස ආසාදිත මරණ ගණන 131,660කි.

මේ අතර, ‘‘මම හිතනවා අපි ඉතා හොඳ තත්ත්වයක සිටිනවා’’ යැයි ඇමෙරිකානු ජනාධිපතිවරයා ඊයේ (7) පැවැසීය. ලෝක සෞඛ්‍ය සංවිධානයෙන් ඇමෙරිකා එක්සත් ජනපදය නිල වශයෙන් ඉවත් කරගන්නා බව නිවේදනය කරමින් ඇමෙරිකානු ජනාධිපතිවරයා ඒ බව කීය.

නව කොරෝනා වයිරසය මර්දනය කිරීම සඳහා ඇමෙරිකානු ජනාධිපතිවරයා කටයුතු කළ ආකාරය එරට පමණක් නොව ජාත්‍යන්තරයේ ද දැඩි විවේචනයට ලක්ව ඇත.

ඒ.එෆ්.පී.

055