(ඉන්දිකා රාමනායක)

මෙවර නිදහස් උත්සවය සදහා සහභාගී වූ සිවිල් ආරක්ෂක දෙපාර්තමේන්තුවේ භට කණ්ඩායමෙන් 50 ආසන්න පිරිසක් කොවිඩ් ආසාදිතයන්  බවට  හදුනාගෙන ඇති බව  සිවිල් ආරක්ෂක දෙපාර්තමේන්තුව පවසයි.

තෝරාගත් නිලධාරිනියකට කොවිඩ් ආසාදනය වීම හේතුවෙන් මෙවර උත්සවයට සිවිල් ආරක්ෂක දෙපාර්තමේන්තුවේ කිසිදු කාන්තා නියෝජනයක් සිදු නොවු බවද  සිවිල් ආරක්ෂක දෙපාර්තමේන්තුවේ  පිරිස් පාලන අධ්‍යක්ෂ කර්නල් ඊප්සිත  දිසානායක මහතා පැවසීය.

නිදහස් උත්සවයට  සිවිල් ආරක්ෂක දෙපාර්තමේන්තුවේ  450 ට ආසන්න පිරිසක් සහභාගි වු බවත්  ඔවුන් අතරින් මෙම පිරිස  ආසාදිතයන් වශයෙන් හදුනාගෙන ඇති බව  දිසානායක මහතා පැවසීය.මෙම පිරිස  දැනට    කල්පිටිය,  කළුතර සේරුපිට,  ගල්කිරියාගම  සහ   අම්පාර පහළලන්ද යන කඳවුරුවල නිරෝධායනය සදහා යොමු කර ඇති බවද හෙතෙම  කියා සිටියේය.

නිදහස් උත්සවය නිමිත්තෙන් සිවිල් ආරක්ෂක දෙපාර්තමේන්තුවේ   600 ට පිරිසක්  මුලින්ම තෝරාගෙන  සිටි ඇති අතර ඔවුන් පී සී ආර් පරීක්ෂණයට ලක්කර  අනුරාධපුර  පුහුණු   මධ්‍යස්ථානයට  පුහුණු වීම් සිදුකළ බව  ඒ මහතා සඳහන් කළේය.

මොවුන් අතරින්  65 පමණක් වු  කාන්තාවන් පිරිස මිහින්තලේ මධ්‍යස්ථානයේ ද තවත්    භටයන් 180 ක්   අනුරාධපුර නීතියගම  කඳවුරේද, තවත් 53 දෙනෙකු  මිහින්තලේ ප්‍රදේශයේ  විහාරස්ථානයක්, තවත් 80 දෙනෙකු  රබෑව ප්‍රදේශයේ  විහාරස්ථානයක් නේවාසිකව සිටි බව  හෙතෙම අවධාරණය කළේය.

පෙර පුහුණුව  නිමා කිරීමෙන් පසු  තෝරාගත් පිරිසක් අහඹු පරීක්ෂණයට ලක් කිරීමේ දී කාන්තා භටවරියකට  හා   මිහින්තලේ  විහාරස්ථානයේ  නේවාසිකව සිටි පිරිස අතරින්  ඉන් භටයකු  කොවිඩ් ආසාදිතයන් වශයෙන් තහවුරු වීමෙන් පසු සිවිල්   ආරක්ෂක දෙපාර්තමේන්තුවේ අධ්‍යක්ෂ ජනරාල් මේජර්  ජනරාල් නන්දන සේනාධීර මහතාගේ උපදෙස් මත හම මධ්‍යස්ථාන දෙකේ සිටි  සියලු දෙනා   ඉවත් කර  සෙසු  පිරිස පමණක්   නිදහස් උත්සවය සදහා යොමු කළ බවද හෙතෙම කීය.

නිදහස් උත්සවයට සහභාගි වු පිරිස නිවෙස්වලට නොයවා  නිරෝධායනයට යොමුකර  යළිත් පී. සී ආර් පරීක්ෂණයට ලක් කිරීමේ දී ඔවුන් අතරින් ද   ආසාදිතයන්  වාර්තා වී ඇති බවද ඒ මහතා කියා සිටියේය.

උත්සවයට සහභාගි වු එම   සියලු පිරිස   කල්පිටිය, සේරුපිටිය, ගල්කිරියාගම,  පහළ ලන්ද යන   මධ්‍යස්ථාන වල  නිරෝධායන සදහා යොමුකර ඇති බවත් කල්පිටයේ පිරිස ඊයේ දිනයේ පී සී ආර් පරීක්ෂණයට යොමු කළ බවද  හෙතෙම වැඩිදුරටත් පැවසීය.