(ප්‍රියංකර ජාතුංගම)

කලවාන මූලික රෝහලේ ළමා වාට්ටුව බාරව සිටි වෛද්‍යවරියක ස්වයං නිරෝධානයට ලක් කිරීම හේතුවෙන් රෝහලේ ළමා වාට්ටුව වසා දැමිමට පියවර ගෙන තිබේ.

කලවාන මූලික රෝහල ප්‍රකාශ කලේ එම වෛද්‍යවරිය සමග සිටි තවත් වෛද්‍යවරුන් දෙදෙනකු හා හෙදියන් 16 දෙනෙකු කාර්ය මණ්ඩලයේ දස දෙනෙකු ස්වයං නිරෝධානයට ලක්කර ඇති බවය.

ළමා වාට්ටුව බාරව සිටි වෛද්‍යවරියගේ පී.සී.ආර් වාර්තා ලැබෙන තෙක් ළමා වාට්ටුව යළි විවෘත නොකරන බවත් එය එම වාට්ටුවට පැමිණෙන අයගේ සෞඛ්‍ය ආරක්ෂාව උදෙසා ගත් පියවරක් බවත් කලවාන මූලික රෝහලේ ප්‍රකාශකයකු කීය.

ළමා වාට්ටුව හැර අනෙකුත් වාට්ටු හා ප්‍රතිකාර සුපුරුදු ලෙස සිදුවන බවත් සායන කටයුතු රෝගින්ගේ සෞඛ්‍ය වාර්තා තබන පොත් බලා ප්‍රතිකාර ලබාදීමට කටයුතු කර ඇති බවත් කලවාන මූලික රෝහලේ ප්‍රකාශකයකු පැවසීය.

රෝහලේ වෛද්‍යවරුන් හා හෙදියන් කාර්ය මණ්ඩලය ස්වයං නිරෝධානයට ලක්වීම හේතුවෙන් රෝහල් කටයුතු ඉතා අසීරුවෙන් පවත්වාගෙන යන බවද කලවාන මූලික රෝහලේ ප්‍රකාශකයකු කීය.