(දිනේෂ් උපේන්ද්‍ර)    
 
උපකාරක පන්ති පැවැත්වීම පිළිබඳව සෞඛ්‍ය බලධාරින් විසින් ලබා දී තිබූ උපදෙස් නොතකමින් මුදල් ඉපැයීමේ පරමාර්ථයෙන් ඒ සඳහා විශාල ලෙස සිසුන් ගෙන්වාගෙන තිබූ කුලියාපිටිය උපකාරක පන්ති කිහිපයකම නිරීක්‍ෂණ චාරිකාවක නිරත වූ කුලියාපිටිය සෞඛ්‍ය වෛද්‍ය කාර්යාලයේ නිලධාරිහු උපකාරක පන්ති ගුරුවරුන්ට දැඩි අවවාද කිරීමට පියවර ගත්හ.

සිසුන් වැඩි වශයෙන් සහභාගිව සිටි ඇතැම් උපකාරක පන්තිවල ගුරුභවතුන්ද මුහුණු ආවරණ නිසිලෙස නොපැළැඳ සිට ඇති බව නිරීක්‍ෂණය කර තිබූ එම සෞඛ්‍ය බලධරයින් ඊට සහභාගි වූ සිසුන්ද එම ගුරුවරුන් අනුගමනය කරමින් මුහුණු ආවරණ නොපැළඳ ඉගෙනුම ලබන ආකාරය නිරීක්‍ෂණය කර එම අවස්ථාවේම දැඩිසේ අවවාද කර ඇත.

එමෙන්ම සිසුන් පිරිස වටවී එකට ආහාර ගන්නා ආකාරයද නිරීක්‍ෂණය කරගෙන තිබූ සෞඛ්‍ය බලධරයින් මෙම අවස්ථාවේ අදාළ කරුණු නිවැරදි කරගැනීමට අපොහොසත් වන්නේ නම් නිරෝධායන නීතිය දැඩිව ක්‍රියාත්මක කිරීමට සිදුවන බවද අවධාරණය කර තිබිණ.