(*** දසුන් රාජපක්ෂ)

ජාත්‍යන්තරය සතුටු කිරීම සඳහා යහපාලන ආණ්‍ඩුව මෙරට ක්‍රියාත්මක වූ ත්‍රස්ත සංවිධාන සහ ත්‍රස්තවාදීන්ගේ නම් අඩුවෙන් අසාදු ලේඛනගත කර ඇති බව දේශපාලන පලිගැනීම් පිළිබඳ විමර්ශනය කරන ජනාධිපති කොමිසම හමුවේ සාක්ෂි දුන් හිටපු ආරක්ෂක ලේකම්වරයකු වූ උත්පල දයානන්ද බස්නායක මහතා ඊයේ (16) පැවැසීය.

උත්පල දයානන්ද බස්නායක මහතා එලෙස සඳහන් කළේ කර්නල් ශම්මි කුමාරරත්න මහතා කළ පැමිණිල්ලක සාක්ෂිකරුවකු වශයෙන් ජනාධිපති කොමිසම ඉදිරියේ සාක්ෂි දෙමිනි.

සාක්ෂි ලබාදීමේ කටයුතු එම ජනාධිපති කොමිසමේ සභාපති විශ්‍රාමික ශ්‍රේෂ්‍ඨාධිකරණ විනිසුරු උපාලි අබේරත්න මහතා ප්‍රමුඛ ත්‍රිපුද්ගල විනිසුරු මඬුල්ල ඉදිරියේ සිදු කෙරුණි.

එහිදී විනිසුරුවරුන් සහ නීතිඥවරුන් ඇසූ ප්‍රශ්නවලට පිළිතුරු දෙමින් සාක්ෂි ලබාදුන් හිටපු ආරක්ෂක ලේකම්වරයකු වූ උත්පල දයානන්ද බස්නායක මහතා මෙසේ ද කීය.

“2015 වර්ෂයේ ජනවාරි 11 වැනිදා ආරක්ෂක ලේකම් ලෙස මට පත්වීම ලැබුණා. එම පත්වීම කළේ යහපාලන ආණ්‍ඩුව මගින්. එක්සත් ජාතීන්ගේ සංවිධානයට සම්බන්ධ රටවල් අතර 1373 නමැති ප්‍රඥප්තියට ලංකාව අත්සන් කර තිබෙනවා. ජාත්‍යන්තරව එක්වී ත්‍රස්තවාදය වැළැක්වීමට ගත යුතු පියවර ඇතුළත් එම ලේඛනයට ලංකාව අත්සන් කළා.”

විනිසුරු මඬුල්ල:- ඒ ප්‍රඥප්තිය අත්සන් කළේ කුමන වර්ෂයේ ද?
සාක්ෂිකරු:- 2001 වසරේදී ස්වාමීනි. මෙම ලේඛනය සකස් කර තිබෙන්නේ දෙස් විදෙස් බුද්ධි අංශවල සහයෝගය ඇතිව. එම ලේඛනය මගින් වසරක් පාසා ලොව තුළ ක්‍රියාත්මක වන ත්‍රස්තවාදී සංවිධාන සහ ත්‍රස්තවාදීන් අසාදු ලේඛනගත කරනවා. අපේ ආරක්ෂක අමාත්‍යාංශය ද වසරක් පාසා එම ලේඛනය යාවත්කාලීන කරනවා.

2014 වර්ෂයේ ඉදිරිපත් වී තිබුණු අසාදු ලේඛනයේ මෙරට තුළ ත්‍රස්තවාදී සංවිධාන 16ක් හා ත්‍රස්තවාදීන් 424 දෙනකු නම් කර තිබුණා. 2015 වර්ෂයේ එම ලේඛනය යාවත්කාලීන කිරීමට ආරක්ෂක අමාත්‍යාංශයෙන් දැනුම්දීමක් කළේ නැහැ. නම් කළ ත්‍රස්තවාදී සංවිධානවල තත්ත්වය සොයා බලා එම අසාදු ලේඛනය යාවත්කාලීන කරනවා. යම් පුද්ගලයකු හෝ සංවිධානයක් තවදුරටත් ත්‍රස්තවාදී සංවිධානයක් නොවන බවට ප්‍රබල සාක්ෂි ලැබුණොත් ඔවුන් ඉන් ඉවත් කරනවා.

සුරේන් සුරේන්ද්‍රන් සහ ජෝසෆ් එම්මානුවෙල් පියතුමා යන දෙදෙනාගේ නම් එම අසාදු ලේඛනයේ තිබුණා.

නීතිඥ මඬුල්ල:- අසාදු ලේඛනයෙන් පුද්ගලයන්ගේ නම් ඉවත් කරන්නේ කෙසේ ද?
සාක්ෂිකරු:- ආරක්ෂක අමාත්‍යවරයා, ජනාධිපතිවරයා සහ ආරක්ෂක මණ්‍ඩලය දැනුවත් කර යම් යම් අය ත්‍රස්තවාදී කටයුතු නොකරන බව අනාවරණය වුවහොත් ඔවුන්ගේ නම් ඉවත් කරනවා.
අසාදු ලේඛනයෙන් පුද්ගලයකු ඉවත් කිරීමේ බලය තිබෙන්නේ විදේශ කටයුතු අමාත්‍යවරයාටයි. ඒ ආරක්ෂක අමාත්‍යවරයා නිර්දේශ ඉදිරිපත් කළ පසුවයි.

නීතිඥ මඬුල්ල:- මෙම අසාදු ලේඛනය ගැන සෙවීමට 2015 වසරේ ඔබට කැඳවීමක් ලැබුණා ද?
සාක්ෂිකරු:- එවකට විදේශ කටයුතු අමාත්‍යවරයා ඒ ගැන සෙවීමට මගේ අමාත්‍යාංශයෙන් නිලධාරීන් දෙදෙනකු ඉල්ලා තිබුණා.

නීතිඥ මඬුල්ල:- එයට කැඳවූයේ කුමන නිලධාරීන් ද?
සාක්ෂිකරු:- මේජර් කේ. රණවීර හා ලුතිනන් කර්නල් ශම්මි කුමාරරත්න යන අය කැඳවූවා.

නීතිඥ මඬුල්ල:- ශම්මි කුමාරරත්න කවුද?
සාක්ෂිකරු:- විදේශ බුද්ධි අංශ සම්බන්ධ නිලධාරියා ලෙස ඔහු කටයුතු කළා. ඒ වනවිට ජාතික බුද්ධි ප්‍රධානියකු පත්කර තිබුණේ නැහැ. ජාතික බුද්ධි ප්‍රධානියා පත්කරන තෙක් එම තනතුරේ වැඩ බැලීමට ශම්මි කුමාරරත්න 2015 අප්‍රේල් 23 සිට පත්කළා. අසාදු ලේඛනයේ තිබූ දෙදෙනකුගේ නම් ඉවත් කිරීමට එවකට විදේශ කටයුතු ඇමැති වූ මංගල සමරවීර මහතා තමාට තර්ජනය කළ බව ශම්මි කුමාරරත්න මට ප්‍රකාශ කළා.

2014 ඉදිරිපත් වූ අසාදු ලේඛනයේ සුරේන් සුරේන්ද්‍රන් සහ ජෝසෆ් එම්මානුවෙල් පියතුමාගේ නම් සඳහන්ව තිබුණා. ඔවුන්ගේ ත්‍රස්ත ක්‍රියා නවතා ඇති නම් ඔවුන්ගේ නම් අසාදු ලේඛනයෙන් ඉවත් කිරීමට විදේශ කටයුතු අමාත්‍යවරයා ලිඛිතව ඉල්ලා සිටිය යුතුයි. සොයා බලන විට ඔවුන් දෙදෙනා ඒ වනවිට ද ත්‍රස්තවාදී ක්‍රියාකාරකම් සිදුකරමින් සිටි නිසා මංගල කළ ඉල්ලීම ගැන මම කිසිදු ක්‍රියාමාර්ගයක් ගත්තේ නැහැ. මෙය ජාතික ආරක්ෂාවට ඍජුව බලපාන නිසා මා කිසිත් නොකර සිටියා. 2015 සැප්තැම්බර් 8 වැනිදා මා විශ්‍රාම යනතුරු එම ස්ථාවරයේ සිටියා.

2015 නොවැම්බර් 20 අසාදු ලේඛනයක් සකස් කර ඇති බව මා දැනගත්තා. ඉන් ත්‍රස්තාවාදීන් 115ක් සහ ත්‍රස්තවාදී සංවිධාන 6ක් දක්වා ප්‍රමාණයක් අඩුවී තිබුණා.

නීතිඥ මඬුල්ල:- ඊට අදාළව 2015 වර්ෂයේ ඉදිරිපත් වූ අසාදු ලේඛනය ඉදිරිපත් වනවිට ඔබ ආරක්ෂක ලේකම්ව සිටියා ද?
සාක්ෂිකරු:- නැහැ. කරුණාරත්න හෙට්ටිආරච්චි මහතා තමයි ආරක්ෂක ලේකම්ව සිටියේ. 2015 අසාදු ලේඛනයේ එතරම් ත්‍රස්ත සංවිධාන හා පුද්ගලයන් අඩුවීම ගැන මට සැක හිතුනා. එය ජාතික ආරක්ෂාවට තර්ජනයක්.

විනිසුරු මඬුල්ල:- විදෙස් රටවල් සතුටු කිරීමට ද ඉවත් කිරීම් කළේ?
සාක්ෂිකරු:- යහපාලන ආණ්‍ඩුව ගත් ක්‍රියාමාර්ග නිසා එය පැහැදිලි වෙනවා.

නීතිඥ මඬුල්ල:- එලෙස අසාදු ලේඛනයේ නම් ඉවත් කළ හැකි ද?
සාක්ෂිකරු:- එලෙස ඉවත් කිරීමට ජනාධිපතිවරයාට හෝ අගමැතිවරයාටත් බැහැ. එය ජාත්‍යන්තර සම්මුතියක්.